Yn ôl y gyfraith, mae'n rhaid i bob busnes bwyd gofrestru gydag Iechyd yr Amgylchedd o leiaf 4 wythnos cyn ei fod yn bwriadu agor. Bydd angen caniatâd Iechyd yr Amgylchedd ar rai busnesau bwyd i weithredu.
Cofrestru
Os ydych yn berchen ar fusnes bwyd neu wedi cymryd un drosodd ym Mhowys, mae'n rhaid i chi yn ôl y gyfraith, gofrestru eich busnes gyda'r cyngor o leiaf 28 diwrnod cyn ei agor neu gymryd perchnogaeth.
Nid oes rhaid talu am gofrestru. Bydd y manylion yn cael eu rhoi ar ein cofrestr a bydd rhai manylion, megis y math o fusnes, cyfeiriad a rhif ffôn ar gael i'w harchwilio gan y cyhoedd. Ni fydd y cyhoedd yn gallu gweld y manylion eraill y byddwch wedi'i roi.
Ar ôl i chi gofrestru, bydd angen i chi roi gwybod i ni os oes newid mewn perchnogaeth neu newid yn natur y busnes.
I gofrestru busnes bwyd, llenwch ffurflen ar-lein trwy ddefnyddio'r ddolen ganlynol - Cofrestru Busnes Bwyd.
Cymeradwyaeth
Efallai bydd angen i'ch busnes bwyd gael ei gymeradwyo os ydych yn bwriadu gweithgynhyrchu eich nwyddau o gynhyrchion heb eu prosesu sy'n dod o anifeiliaid. Er enghraifft, cig ffres, briwgig ffres, llaeth neu wyau amrwd. Mae hyn yn cynnwys:
Briwgig, bwydydd o gigoedd, cynnyrch cig a chig sy'n cael ei wahanu â pheiriant
Molysgiaid dwygragennog byw a chynnyrch pysgodfa
Llaeth amrwd (ac eithrio llaeth buwch amrwd)
Cynnyrch llaeth
Wyau a chynhyrchion wyau (ddim yn brif gynnyrch)
Cynnyrch eraill o anifeiliaid (mynnwch air gyda ni)
Ni allwch agor eich sefydliad bwyd tan ei fod wedi'i gymeradwyo gan yr awdurdod hwn. O dan y broses gymeradwyo bydd rhaid i chi wneud yn siwr bod trefniadau yn eu lle i reoli diogelwch bwyd yn seiliedig ar egwyddorion HACCP.
Bydd dogfennau HACCP yn rhan o'ch system rheoli diogelwch bwyd a dylid eu teilwra i fod yn addas i'ch busnes chi. Dylent fod yn syml ac yn briodol ar gyfer maint eich busnes a'r math o gynhyrchu yr ydych yn bwriadu ei wneud.
Eithriadau
Mae'n bosibl bod rhai eithriadau - yn dibynnu os yw'r safle'n fasnachol neu'n cyflenwi ar sail ymylol, lleol a chyfyngedig
Cais i'w gymeradwyo
Yn ogystal â chofrestru, bydd angen cymeradwyo rhai busnesau i weithredu. Os ydych yn bwriadu gweithgynhyrchu eich nwyddau o gynhyrchion heb eu prosesu sy'n dod o anifeiliaid (e.e. cig ffres, briwgig ffres, llaeth neu wyau amrwd), a fyddech gystal â tharo golwg dros yr adran 'Cymeradwyo' ar y dudalen hon.
Mae'n rhaid i chi ofyn am gyngor cyn cyflwyno cais. Byddwn yn rhoi help llaw i chi wneud y trefniadau angenrheidiol cyn i chi gyflwyno ffurflen gais.
Gallwch hefyd gael ffurflen gais trwy ddefnyddio'r manylion cyswllt ar y dudalen hon. A fyddech gystal â llenwi'r ffurflen a'i dychwelyd i'r swyddfa ardal leol.
Os ydych yn cofrestru eich eiddo'n unig (NID yn gwneud cais i fod yn safle cymeradwy) gallwch gymryd bod eich cais wedi cael ei dderbyn os na fyddwch wedi clywed oddi wrthym ni o fewn 28 diwrnod
Apeliadau a chwynion
Ceisiadau ar gyfer safleoedd cymeradwy
Os ydych yn anfodlon gyda'n penderfyniad, mae croeso i chi gysylltu â ni i'w drafod.
Eraill sydd â diddordeb
Os nad chi yw'r ymgeisydd ac rydych yn anfodlon â'r penderfyniad i roi cymeradwyaeth, gallwch apelio yn erbyn y penderfyniad hwnnw, o fewn 1 mis
Llys Ynadon Y Trallwng Mansion House 24 Stryd Hafren Y Trallwng SY21 7UX
Cwynion gan ddefnyddwyr
Os ydych yn unigolyn preifat gyda chwyn am fusnes bwyd cofrestredig neu gymeradwy, cysylltwch â'r busnes yn gyntaf. Os na fydd hynny'n gweithio, cysylltwch â ni gan ddefnyddio'r manylion ar y dudalen hon.
