Byddwch yn barod am 20mya
24 Ebrill 2023
Ar 17 Medi, bydd Llywodraeth Cymru yn cyflwyno terfyn cyflymder diofyn o 20mya ar gyfer ffyrdd cyfyngedig yng Nghymru. Yn gyffredinol, mae ffyrdd cyfyngedig yn cynnwys y rheini ble mae goleuadau stryd wedi eu gosod ddim mwy na 200 llath o'i gilydd, ac fel arfer wedi eu lleoli mewn ardaloedd preswyl a phrysur ble mae gweithgaredd uchel gan gerddwyr.
Cymru fydd y genedl gyntaf yn y DU i ostwng terfyn cyflymder yn dilyn y symudiad hwn, gan ddilyn ôl troed gwledydd Ewrop fel Sbaen ble mae 30km/h (18.5mya) eisoes mewn lle.
Mae tystiolaeth yn dangos fod gostwng y terfyn cyflymder diofyn o 30mya i 20mya ar y ffyrdd hyn yn arwain at nifer o fanteision gan gynnwys lleihau nifer y damweiniau ac anafiadau difrifol, annog rhagor o bobl i gerdded a beicio a gwella iechyd a llesiant.
Wrth baratoi am y newidiadau bydd y cyngor yn gweithio i gael gwared ar peth o'r marciau terfyn cyflymder cyfredol, neu gylchigau, ar ffyrdd y sir. Caiff newidiadau i arwyddion eu rhaglennu hefyd, yn barod am y dyddiad cychwyn sef 17 Medi. Bydd cylchigau newydd a newidiadau eraill i arwyddion yn parhau i gael eu cyflwyno ar ôl y dyddiad gweithredu.
"Mae Llywodraeth Cymru wedi cymryd cam beiddgar wrth weithredu terfyn cyflymder diofyn newydd o 20mya ledled y sir," esbonia'r Cynghorydd Sir Jackie Charlton, Aelod Cabinet Dros Bowys Wyrddach, "ond bydd y manteision y gallwn obeithio eu gweld ynghylch cyflymder gyrru arafach, gwell diogelwch a chynnydd o ran lefelau beicio a cherdded, yn bellgyrhaeddol o'u cymharu â'r amharodrwydd i newid.
"Mae canfyddiadau sy'n dilyn gweithredu 20mya eraill yn y DU a threialon yma yng Nghymru, yn dangos fod hyd yn oed gostyngiad bach i gyfartaledd cyflymder traffig ble mae pobl yn byw ac yn gweithio yn gallu arwain at ostyngiad sylweddol mewn damweiniau ac anafiadau difrifol gan helpu i wneud cymunedau'n fwy diogel.
"Bydd y terfyn amser newydd o 20mya hefyd yn cydweddu â'n rhwydwaith cynyddol o lwybrau teithio llesol ledled y sir, ble yr ydym yn annog pobl i wneud teithiau byr a lleol ar droed neu feic yn hytrach na mewn car. Y gobaith yw y bydd rhagor o deuluoedd Powys yn cael yr hyder i ddewis cerdded neu feicio i'r ysgol ac adref gan wybod bydd y ffyrdd yn fwy diogel.
"Er bod mis Medi rai misoedd i ffwrdd, mi fydd yma'n ddigon buan, felly bydd gwaith paratoi'r newid yn dechrau o ddifri ledled y sir cyn gynted ag sy'n bosibl i wneud yn siŵr ein bod ni'n barod am 20mya!
Bydd manylion pellach am y terfyn cyflymder diofyn o 20mya a pha ffyrdd fydd yn newid ar gael cyn bo hir.