Sophia yn rhannu rysáit ei theulu maeth mewn llyfr coginio newydd sy'n cael ei gefnogi gan enwogion.
14 Mai 2024
Mae ymchwil ddiweddar gan Faethu Cymru - sef rhwydwaith cenedlaethol gwasanaethau maethu'r awdurdod lleol - yn dangos nad yw pobl yn gwneud cais i ddyfod yn ofalwyr oherwydd nad ydynt yn credu bod ganddynt y sgiliau na'r profiad 'cywir'.
Yn eu llyfr newydd - Dewch â rhywbeth at y bwrdd- a gyhoeddwyd yr wythnos hon gan Faethu Cymru, amlygir y pethau syml y gall ofalwyr eu cynnig - fel sicrhau pryd o fwyd rheolaidd, amser gyda'r teulu o amgylch y bwrdd, a chreu hoff brydau bwyd newydd.
Mae pobl ifanc sydd â phrofiad o fod mewn gofal wedi chwarae rhan bwysig yn natblygiad y llyfr coginio. Cafodd darluniadau'r llyfr eu creu gan Sophia Warner, sy'n ddarlunydd ac ymgyrchydd â phrofiad o fod mewn gofal ei hun, hi hefyd ysgrifennodd y rhagair i'r llyfr:
"Pan oeddwn i'n iau, dw i'n cofio croesholi fy mam faeth ynglŷn â tharddiad y bwyd y byddai'n ei baratoi. Roeddwn i'n mynnu ei fod yn dod o Aberhonddu, sef milltir sgwâr fy mhlentyndod. Fe ysgrifennais 'Bolognese Aberhonddu' ar gyfer y llyfr coginio, yn seiliedig ar rysáit fy mam faeth.
"Mae'r rysáit hon yn annwyl iawn i mi, gan mai dyma'r pryd o fwyd cyntaf ges i pan symudais i mewn i'm cartref maeth. Soniais fod fy mam enedigol arfer ei baratoi i mi, ac aeth fy mam faeth ati i'w baratoi i mi. Wrth i mi eistedd wrth y bwrdd gyda fy nheulu maeth newydd, cefais deimlad cynnes - teimlais fy mod yn perthyn a chefais groeso cynnes."
Mae angen rhagor o deuluoedd maeth ledled Cymru
Yng Nghymru mae mwy na 7,000 o blant mewn gofal, ond dim ond 3,800 o deuluoedd maeth sydd. Mae Maethu Cymru wedi cychwyn ar eu nod beiddgar o recriwtio dros 800 o deuluoedd maeth newydd erbyn 2026, i ddarparu cartrefi croesawgar i blant a phobl ifanc lleol.
Dywedodd y Cynghorydd Sandra Davies, Aelod Cabinet Cyngor Sir Powys ar Gyfer Cenedlaethau'r Dyfodol: "Mae'n ffantastig fod Sophia, un o'n pobl ifanc sydd â phrofiad o fod mewn gofal, wedi bod mor gysylltiedig â'r llyfr newydd hwn sy'n llawn ryseitiau a phrofiadau maethu sy'n newid bywydau oddi wrth ofalwyr a phobl sydd wedi cael profiad o fod mewn gofal.
"Diolch yn fawr iawn i chi Sophia, ac hefyd i'n pobl ifanc eraill sydd wedi mynd ati i rannu eu straeon a chydnabod y gwahaniaeth wnaeth gofalwyr maeth iddyn nhw.
"Mae pythefnos Gofal Maeth yn gyfle unwaith yn rhagor i ni ddiolch i'n gofalwyr maeth am y gwaith anhygoel maen nhw'n ei wneud i gefnogi ein pobl ifanc ym Mhowys, gan eu gwneud nhw i deimlo'n ddiogel a'u bod yn derbyn croeso a gofal. Mae'r llyfr yn dangos mai'r pethau syml yr ydym yn eu cynnig i blant sy'n aml yn gallu gwneud gwahaniaeth anferthol.
"Mae angen amrywiaeth eang o bobl arnom i ddyfod yn ofalwyr maeth i alluogi ein plant i aros yn agos at eu cymunedau yma ym Mhowys. Mae yna lawer o wahanol ffyrdd y gallwch gefnogi person ifanc a byddwn yn annog unrhyw un sy'n meddwl am faethu i gysylltu â ni am sgwrs anffurfiol."
Mae ganDewch â rhywbeth at y bwrdddros 20 rysáit, gan gynnwys ryseitiau gan y gymuned ofal maeth a chogyddion enwog.
Mae enillydd MasterChef, Wynne Evans; beirniad Young MasterChef, Poppy O'Toole; a'r cogydd/awdur Colleen Ramsey wedi cyfrannu ryseitiau. Mae'r llyfr hefyd yn cynnwys yr athletwraig a'r ymgyrchydd dros ofal maeth, Fatima Whitbread, a fu mewn gofal ei hun.
Fe gyfrannodd cyn-gystadleuydd y Great British Bake-Off, Jon Jenkins, a'r ddigrif-wraig Kiri Pritchard McLean ryseitiau hefyd - gan dynnu o'u profiadau personol fel gofalwyr maeth.
Bydd y llyfr coginio'n cael ei ddosbarthu i ofalwyr maeth ledled Cymru, a gellir lawrlwytho fersiwn digidol yma:www.maethucymru.llyw.cymru
I gael rhagor o wybodaeth am ddyfod yn ofalwr maeth ewchhttps://powys.maethucymru.llyw.cymru/ffoniwch 0800 223 0627