Cynllun Datblygu Lleol Newydd Powys (2022-2037): Dweud eich dweud ar y Strategaeth a Ffefrir
19 Awst 2024
Ar hyn o bryd, mae Cyngor Sir Powys yn paratoi ei Gynllun Datblygu Lleol Newydd, a fydd yn cwmpasu Powys gyfan ac eithrio Parc Cenedlaethol Bannau Brycheiniog.
Bydd y Cynllun Datblygu Lleol Newydd yn nodi cynigion a pholisïau defnydd tir y Cyngor ar gyfer datblygu tir yn ei ardal yn y dyfodol. Mae'n cwmpasu'r cyfnod o 15 mlynedd o 2022 i 2037 ac fe'i defnyddir i lywio penderfyniadau ar geisiadau cynllunio ar ôl iddynt gael eu mabwysiadu.
Mae'r Strategaeth a Ffefrir yn cynnig fframwaith strategol i lywio'r polisïau cynllunio manwl a'r dyraniadau tir a wneir yng nghamau'r broses o baratoi'r Cynllun Datblygu Lleol yn y dyfodol.
Mae'r Strategaeth a Ffefrir yn nodi'r materion allweddol sy'n effeithio ar ardal y cynllun ac yn cynnig sut y gellir mynd i'r afael â'r rhain drwy weledigaeth, amcanion a pholisïau strategol eang. Mae'r ymgynghoriad yn ymdrin â graddfa arfaethedig twf tai a chyflogaeth yn y dyfodol a strategaeth ofodol ar gyfer datblygu ym Mhowys ac eithrio Parc Cenedlaethol Bannau Brycheiniog.
Cynhelir ymgynghoriad ar y Strategaeth a Ffefrir o ddydd Llun, 19 Awst i ddydd Llun, 7 Hydref.
Gwahoddir sylwadau hefyd ar y safleoedd ymgeisiol a restrir yn y Gofrestr Safleoedd Ymgeisiol a gyflwynwyd yn ystod yr Alwad am Safleoedd Ymgeisiol yn 2022.
Dywedodd y Cynghorydd Jake Berriman, Aelod y Cabinet ar gyfer Cysylltu Powys: "Bydd y Cynllun Datblygu Lleol Newydd yn ddogfen allweddol a fydd yn arwain graddfa a lleoliad datblygiadau yn y sir yn y dyfodol.
Nid yw'r Strategaeth a Ffefrir yn cynnwys yr holl bolisïau manwl a fydd yn y ddogfen derfynol, ond mae'n nodi cyfeiriad eang a strategol a gynigir ar gyfer y Cynllun Datblygu Lleol Newydd.
Bellach mae gan breswylwyr gyfle i weld manylion fel rhan o'r ymgynghoriad hwn ac rwy'n annog pawb sydd â diddordeb i edrych ar y dogfennau hyn a chyflwyno eu barn.
"Rydym am ymgysylltu â chymaint o drigolion, busnesau a datblygwyr â phosibl drwy gydol y broses hon, er mwyn cael ystod eang o safbwyntiau a fydd yn llywio'r CDLl Newydd."
I gymryd rhan yn yr ymgynghoriad, ewch i Cynllun Datblygu Lleol Newydd (2022 - 2037)
Fel arall, mae'r prif ddogfennau ymgynghori hefyd ar gael i'w harchwilio'n bersonol yma:
- Cyngor Sir Powys, Neuadd y Sir, Llandrindod, Powys, LD1 5LG yn ystod oriau swyddfa arferol.
- Y llyfrgelloedd canlynol yn ystod oriau agor: Aberhonddu, Llanfair-ym-Muallt, Llandrindod, Llanfyllin, Llanidloes, Llanwrtyd, Machynlleth, Y Drenewydd, Llanandras, Rhaeadr Gwy, Y Trallwng ac Ystradgynlais.
Gellir gofyn am ragor o wybodaeth drwy e-bostio: ldp@powys.gov.uk
Rhannu'r dudalen hon
Argraffu
