Cefnogi Gofalwyr yn y gweithle
9 Hydref 2024
Yn ôl Gofalwyr Cymru, bob dydd mae 12,000 o bobl yn y DU yn dod yn Ofalwyr i gefnogi'r rhai sy'n anabl, yn hŷn neu'n sâl ac ychydig iawn sy'n gwybod ble i gael gwybodaeth a chymorth.
Mae'r Cyngor wedi ymuno â'r cynllun i greu gweithle cynhwysol lle mae Gofalwyr yn cael eu cydnabod, eu parchu a'u cefnogi.
Dywedodd y Cynghorydd Jake Berriman, Aelod Cabinet dros Bowys Gysylltiedig: "Yn ein harolwg staff diweddaraf, dywedodd 117 o'r 971 o ymatebwyr wrthym eu bod yn ystyried eu hunain yn Ofalwr, a dywedodd 74% o'r 117 wrthym nad yw eu rheolwr llinell yn gwybod am eu cyfrifoldebau gofalu.
"Dros y misoedd nesaf rydym yn cynllunio amrywiaeth o sesiynau gwybodaeth a chymorth i reolwyr a staff, a byddwn yn rhannu gwybodaeth ddefnyddiol drwy gydol y flwyddyn. Bydd gennym hefyd Hyrwyddwr Gofalwyr pwrpasol yn y gweithle a fydd yn brif bwynt cyswllt i staff."
"Rydym yn cydnabod y gall fod yn anodd gweithio a bod yn ofalwr, ac felly drwy arwain drwy esiampl, rydym yn gobeithio annog cyflogwyr lleol eraill i wneud yr un fath, gan helpu i gadw gweithwyr medrus ledled Powys."
Dywedodd Richard Meade, Cyfarwyddwr y Gwledydd Datganoledig, Carers UK: "Rydym mor falch bod Cyngor Sir Powys wedi ymuno â Chyflogwyr i Ofalwyr (EfC) Cymru. Bydd y dewis i ymuno â rhaglen aelodaeth EfC Cymru yn cefnogi staff sydd â chyfrifoldebau gofalu, mewn cyfnod a all fod yn heriol, i gydbwyso gwaith a gofal.
"Yn ogystal, gan weithio gyda Chyngor Sir Powys, byddwn yn helpu i godi ymwybyddiaeth o faterion sy'n effeithio ar ofalwyr ledled Cymru a chymorth i gyrraedd gofalwyr ar draws gwahanol gymunedau."
Am fwy o wybodaeth, cyngor a chymorth
Os ydych chi neu rywun rydych chi'n ei adnabod yn Ofalwr di-dâl:
- Credu - www.carers.cymru neu ffoniwch 01597 823800
- Gofalwyr Cymru - www.carersuk.org/wales neu ffoniwch 029 2081 1370
Os ydych yn gyflogwr, a bod gennych ddiddordeb yng nghynllun Cyflogwyr i Ofalwyr (EfC), ewch i: www.employersforcarers.org/about-us/wales-hub/
Rhannu'r dudalen hon
Argraffu
