Sefydlu estyniad i fynwent yn y Gelli Gandryll

11 Hydref 2024

Mae mynwent newydd wedi ei sefydlu yn ne Powys diolch i gydweithrediad rhwng y cyngor sir a'r cyngor tref.

Cafodd yr estyniad i'r fynwent bresennol yn y Gelli Gandryll ei ddatblygu ar lain o dir gyfagos gan fod y fynwent wreiddiol yn llawn ar ôl ei hagor ym 1875.

Fel rhan o'r cydweithio, datblygwyd yr erw o dir gan Gyngor Tref y Gelli Gandryll, tra bydd Cyngor Sir Powys yn gyfrifol am ei gweithredu o ddydd i ddydd ynghyd â'r gwaith cynnal a chadw.

Dywedodd y Cynghorydd Richard Church, Aelod Cabinet  ar gyfer Powys Fwy Diogel: "Rwyf wrth fy modd ein bod wedi gallu datblygu mynwent newydd, a fydd yn darparu lle claddu i bobl y Gelli Gandryll am dros 75 mlynedd.

"Ni fyddai'r datblygiad hwn wedi bod yn bosibl oni bai am ein cydweithrediad â Chyngor Tref y Gelli Gandryll a'r cynghorydd sir lleol a hoffwn ddiolch iddynt am ein helpu i gynnal y gwasanaeth pwysig hwn i'r dref."

Dywedodd y Cyng Fiona Howard o Gyngor Tref y Gelli Gandryll "Mae'r cyngor tref yn hapus iawn bod yr estyniad mawr ei angen bellach ar agor. Mae hyn o ganlyniad i gydweithio rhyngom ni â Chyngor Sir Powys a gwaith caled yr holl gynghorwyr oedd ynghlwm â'r holl beth."

Os oes gennych unrhyw gwestiynau neu os hoffech gadw llain, cysylltwch ag Iechyd yr Amgylchedd drwy e-bostio public.protection@powys.gov.uk neu dros y ffôn ar 01597 827467.