O 'egg chasers' i fusnes cynhyrchu wyau

31 Mawrth 2025

Ymhlith y rhai a dderbyniodd grantiau twf busnes gan Gyngor Sir Powys y llynedd - a oedd yn gyfanswm o ychydig llai na £1 miliwn - oedd y chwaraewr rygbi rhyngwladol o Gymru, Dan Lydiate.

Mae Dan, sydd ar hyn o bryd yn chwarae rygbi gyda Dreigiau Casnewydd ac sydd â 75 cap dros Gymru a Llewod Prydain ac Iwerddon, wedi sefydlu ei gwmni cynhyrchu wyau ei hun ar fferm ei deulu yn Abaty Cwm Hir.

Cafodd Cwmni Wyau No6, a enwyd ar ôl rhif y crys y mae fel arfer yn ei wisgo ar y cae rygbi fel blaenasgellwr, ychydig dros £4,000 gan y cyngor sir tuag at feddalwedd newydd i reoli fferm, yn 2024.

Fe'i rhoddwyd tuag at brynu a gosod meddalwedd a chronfa ddata BigFarmNet, gyda'r nod o wella cynhyrchu wyau maes organig.

Dywedodd Dan, sy'n gyfarwyddwr y cwmni: "Rwyf am werthu mwy o wyau yn uniongyrchol i gwsmeriaid lleol a manwerthu gyda chymorth ychwanegol gan y pecyn meddalwedd.

"Byddaf yn gallu cynyddu cynhyrchiant trwy gael mynediad amser real trwy gyfrifiadur ac apiau i'r gosodiadau cynhyrchu. Mae'r meddalwedd yn galluogi mwy o reolaeth sy'n cynnig mwy o gynhyrchiant, a fydd hefyd yn caniatáu imi gyflogi mwy o staff wrth i'r galw dyfu gyda phecynnu wyau."

Roedd Cwmni Wyau No6 eisoes yn cyflenwi wyau i Waitrose a Marks & Spencer, cyn gwneud cais am y grant.

Dywedodd y Cynghorydd David Selby, Aelod Cabinet Cyngor Sir Powys ar gyfer Powys Fwy Llewyrchus: "Mae'n wych ein bod wedi gallu cefnogi 84 o fusnesau dros y 18 mis diwethaf gyda'r cynllun grantiau twf, gan gynnwys prosiectau arallgyfeirio ffermydd fel fferm Dan. Rydym yn dymuno pob llwyddiant iddo yn y dyfodol ac yn gobeithio y bydd yr un mor llwyddiannus fel entrepreneur ag y bu ar y cae rygbi."

Os oes gennych gwestiwn am ddatblygiad economaidd ym Mhowys e-bostiwch: economicdevelopment@powys.gov.uk neu ewch i wefan y cyngor i weld pa gymorth sydd ar gael i fusnesau nawr: Busnesau

Gellir cael help hefyd drwy Busnes Cymru: https://busnescymru.llyw.cymru/

Mae Dan Lydiate ymhlith y nifer o bobl fusnes sydd wedi cael mynediad at hyfforddiant a chyngor drwy Busnes Cymru.

Roedd Grantiau Twf Busnes Powys ar gael i helpu i ariannu cynlluniau cyfalaf a phrosiectau refeniw untro, ac fe'u gweinyddwyd gan Wasanaeth Economi a Hinsawdd y cyngor. Fe'u hariannwyd gan Gronfa Ffyniant Gyffredin Llywodraeth y DU.

LLUN: Dan Lydiate gyda'i ieir maes yn Abaty Cwm Hir.