Adeiladu dyfodol Cryfach, Tecach a Gwyrddach - 16 o dai cyngor newydd i'w hadeiladu ym Mhenybont

15 Mai 2025

Mae ymdrechion i fynd i'r afael â'r argyfwng tai ym Mhowys ar fin cymryd cam sylweddol ymlaen diolch i bartneriaeth a fydd yn gweld 16 o dai newydd yn cael eu hadeiladu ger Llandrindod.

Mae Cyngor Sir Powys a Pickstock Homes wedi ymuno i adeiladu tai fforddiadwy o ansawdd uchel ac sy'n effeithlon iawn o ran ynni yn Nolydd yr Hen Farchnad / Old Market Meadows ym Mhenybont.

Bydd y datblygiad yn Dolydd yr Hen Farchnad / Old Market Meadows yn cynnwys cymysgedd o dai a byngalos dwy a thair ystafell wely. Wedi'u hadeiladu gan Pickstock Homes, bydd y cyngor yn prynu'r eiddo ar ôl eu cwblhau ac yn eu rheoli drwy 'Cartrefi ym Mhowys' - yr un siop ar gyfer yr holl dai cymdeithasol yn y sir.

Dywedodd y Cynghorydd Matthew Dorrance, Dirprwy Arweinydd ac Aelod Cabinet dros Bowys Decach: "Mae'r datblygiad hwn ym Mhenybont yn fwy na brics a morter yn unig - mae'n ymwneud â rhoi sylfaen i bobl leol ar gyfer dyfodol gwell.

"Mae prynu'r tai hyn yn ymrwymiad ariannol mawr gan y cyngor a fydd yn ein helpu i fynd i'r afael â'r argyfwng tai yn y sir.

"Rwyf wrth fy modd ein bod wedi partneru â Pickstock Homes ar y prosiect cyffrous hwn, a fydd yn ein helpu i adeiladu dyfodol cryfach, tecach a gwyrddach i'n cymunedau."

Dywedodd Nick Scott, Rheolwr Gyfarwyddwr Pickstock Homes: "Fel cwmni lleol wedi'i leoli ym Mhowys, rydym yn falch o gyhoeddi dechrau cynllun tai fforddiadwy newydd mewn partneriaeth â Chyngor Sir Powys, gyda'r nod o ddarparu cartrefi sydd eu hangen yn fawr sydd nid yn unig yn fforddiadwy ond hefyd yn gynaliadwy, yn effeithlon iawn o ran ynni, ac wedi'u cynllunio i wella ansawdd bywyd trigolion.

"Byddwn yn sicrhau bod y broses ddylunio ac adeiladu yn parchu cymeriad yr ardal, yn ymgorffori mewnbwn lleol, ac yn cyfrannu'n gadarnhaol at yr economi leol drwy gyfleoedd cyflogaeth a'r gadwyn gyflenwi. Edrychwn ymlaen at weithio gyda rhanddeiliaid lleol a'r gymuned ehangach wrth i'r prosiect pwysig hwn fynd rhagddo."

Mae'r datblygiad hwn yn rhan o ymrwymiad ehangach y cyngor i ddarparu 350 o gartrefi newydd ar gyfer rhent cymdeithasol ledled Powys.

I ddysgu mwy am gynlluniau datblygu tai'r cyngor, ewch i Datblygu Tai