'Effaith domino' yn gwella hyder pobl sydd angen hwb iechyd meddwl

16 Mai 2025

Mae grŵp cyfeillgarwch a sefydlwyd i gynorthwyo adferiad oedolion â salwch meddwl difrifol neu hirdymor wedi bod mor llwyddiannus fel ei fod yn mynd i gael ei gopïo mewn rhannau eraill o Bowys.

Ffurfiwyd Grŵp Domino gan dimau gwaith cymdeithasol iechyd meddwl y cyngor sir yn Aberhonddu ac Ystradgynlais tua diwedd 2023 i helpu'r bobl y maent yn eu cefnogi i oresgyn unigrwydd a meithrin hyder wrth ddefnyddio mannau cyhoeddus a thrafnidiaeth gyhoeddus.

Cafodd ei enw gan un o'r bobl a oedd yn bresennol, a oedd yn gobeithio y byddai'n cael 'effaith domino' mewn ffordd gadarnhaol, ac mae hyn wedi profi i fod yn wir i'r bobl sydd wedi bod yn ei ddefnyddio.

Oherwydd y llwyddiant hwn, mae'r cyngor bellach yn ystyried sefydlu grŵp tebyg yn benodol ar gyfer menywod yn yr ardal ac ar gyfer dynion a menywod mewn rhannau eraill o Bowys.

Dywedodd Lee, un o fynychwyr Grŵp Domino: "Mae'r cyfarfodydd rheolaidd yn llawer o hwyl. Mae'r amserlen wythnosol yn fy atal rhag crwydro oddi ar lwybr bywyd, ac maen nhw'n gwella fy sgiliau cymdeithasol wrth i mi ddod i adnabod pobl na fyddwn i'n disgwyl eu cyfarfod. Rwy'n teimlo'n fwy hyderus o ganlyniad i'r Grŵp Domino."

Ychwanegodd Rich: "Mae'r grŵp domino yn darparu lle diogel a chefnogol i ni rannu ein profiadau fel grŵp neu'n unigol, yn ogystal â gwneud cynnydd gyda'n hiechyd meddwl.

"Wedi'i hwyluso gan Paula a Mel sy'n hyrwyddo cysylltiad, dealltwriaeth ac iachâd trwy ddeialog agored, mae'r grŵp bob amser yn esblygu ac yn ceisio darparu ar gyfer pawb. Rwyf mor falch bod fy nghydlynydd gofal wedi awgrymu i mi ymuno â'r grŵp."

Dywedodd Mark o'r grŵp: "Mae bod yn rhan o Grŵp Domino yn rhoi'r cyfle i ni ddewis ac ymweld â lleoedd sydd o ddiddordeb i ni. Heddiw, fe wnaethom ymweld â lle o'm dewis i, sef Rheilffordd Mynydd Aberhonddu, lle wnes i gynllunio a chyflawni'r daith. Mae mynychu'r grŵp yn lleihau fy unigedd."

Daeth Ewan i'r casgliad: "Mae Domino yn grŵp gwych. Rydym yn mynd i wahanol leoedd, yn cael bwyd ac yn cael llawer o hwyl."

Yr wythnos hon (12-18 Mai) yw Wythnos Ymwybyddiaeth Iechyd Meddwl, gydag Aelod Cabinet Cyngor Sir Powys dros Bowys Ofalgar, y Cynghorydd Sian Cox, yn ei defnyddio i nodi llwyddiant Grŵp Domino.

"Mae Grŵp Domino yn dyst i'r hud a all ddigwydd pan ddown at ein gilydd fel bodau dynol, gan feithrin cysylltiadau â'n gilydd a rhannu ein cryfderau," meddai'r Cynghorydd Cox.

"Mae cyflawniadau'r grŵp yn dangos nad yw pobl â salwch meddwl yn cael eu diffinio gan eu salwch; maent yn fodau dynol cyflawn, gyda phrofiad, sgiliau a syniadau, brwdfrydedd a chymhelliant, a all wneud i bethau da ddigwydd, iddyn nhw eu hunain ac i eraill. Mae Gwasanaethau Cymdeithasol Powys yn defnyddio dull sy'n seiliedig ar gryfderau sy'n canolbwyntio ar y gallu hwn ym mhob un yr ydym yn gweithio gyda nhw. Mae'n cydnabod y gall pobl sydd angen cymorth arwain a llunio eu hadferiad eu hunain, fel y mae'r grŵp hwn yn ei ddangos, a'n rôl ni yw hwyluso hynny.

"Mae fy niolch a'm gwerthfawrogiad diffuant yn mynd i'r gweithwyr cymdeithasol a sefydlodd Grŵp Domino, y cyfranogwyr sydd wedi'i enwi, ei dyfu a'i esblygu, ac iddyn nhw i gyd am roi'r esiampl arbennig hon o gydweithio inni."

Gall unrhyw un ym Mhowys sy'n cael trafferth gyda'u hiechyd meddwl gael cymorth ar unwaith drwy ffonio 111 a dewis opsiwn dau.

Rhagor o wybodaeth am wasanaethau iechyd meddwl ym Mhowys: https://biap.gig.cymru/gwasanaethau/gwasanaethau-iechyd-meddwl-oedolion-a-phobl-hyn/

LLUN: Aelod o Grŵp Domino, Rich, yn cael hwyl ar un o'i deithiau allan i Garwnant.