Y Gronfa Ffyniant Bro a dderbyniwyd ar gyfer prosiectau Powys
4 Mehefin 2025
Nod y Gronfa Ffyniant Bro yw mynd i'r afael â gwahaniaethau rhanbarthol ledled y DU drwy fuddsoddi mewn prosiectau seilwaith lleol hanfodol i gynyddu balchder yn eu cymuned a dod â phobl yn agosach at gyfleoedd.
Bydd y taliad diweddaraf hwn yn cael ei wario ym mlwyddyn ariannol 2025/26, gan gyflawni prosiectau o fewn y sir, gyda'r nod o hybu twristiaeth hamdden a chyfrannu at dwf economaidd lleol. Mae'r rhain yn cynnwys:
- Gosod wyneb newydd - bydd yn gwella mynediad i fannau twristiaeth poblogaidd ac yn cefnogi'r Rhwydwaith Seiclo Cenedlaethol, gan hwyluso ansawdd teithiau gwell i breswylwyr ac ymwelwyr.
- Teithio llesol - bydd yn darparu mynediad gwell rhwng trefi allweddol a'r cyrchfannau twristaidd cyfagos, gan ei gwneud yn haws i ymwelwyr archwilio Powys gan ddefnyddio dulliau teithio llesol a gwella hygyrchedd i leoliadau allweddol i breswylwyr. Yn benodol, bydd y cynlluniau'n cynnwys y rhai a gynlluniwyd ar gyfer Llyn Llandrindod, promenâd Aberhonddu, cam nesaf y llwybr o Landrindod i Hawy a rhan o'r llwybr o Grug Hywel i Langatwg.
- Adnewyddu Hawliau Tramwy - bydd yn galluogi a gwella hygyrchedd ymwelwyr i rwydwaith Hawliau Tramwy amrywiol a gwerthfawr Powys. Bydd y prosiect cychwynnol yn cynnwys amnewid pont droed Pont y Milgy, Ystradgynlais.
"Bydd y cyfraniad diweddaraf hwn o'r Gronfa Ffyniant Bro gan Lywodraeth y DU yn ein galluogi i ddechrau gwneud y gwelliannau sydd eu hangen i seilwaith trafnidiaeth y sir". Eglurir gan y Cynghorydd Jake Berriman, Arweinydd Cyngor Sir Powys.
"Trwy'r buddsoddiad amserol hwn, ein nod yw gwella hygyrchedd i wasanaethau allweddol, annog teithio llesol a chefnogi gweithgareddau hamdden, gan ddarparu teithiau gwell i bawb a gwella cysylltedd â mannau poblogaidd i dwristiaid."
"Rydym yn gobeithio derbyn cadarnhad o gyllid ychwanegol o'r Gronfa Ffyniant Bro i'n galluogi i gwblhau prosiectau pellach yn y dyfodol."
Mae twristiaeth wedi cael ei nodi ers amser maith fel cryfder allweddol i gefnogi twf economaidd a ffyniant ym Mhowys. Bydd y prosiectau lleol sy'n cael eu hariannu gan y Gronfa Ffyniant Bro, yn hybu twristiaeth hamdden ac yn cyfrannu at dwf economaidd lleol drwy'r canlynol:
- gwella hygyrchedd ac ansawdd teithiau i wasanaethau allweddol a lleoliadau twristiaeth;
- ehangu'r gronfa lafur gyda chysylltedd gwell i ddarparu cyfleoedd i fusnesau a chyflogwyr lleol;
- hyrwyddo teithio llesol i gyfrannu at dargedau Sero Net Powys o ran lleihau allyriadau carbon; a
- datblygu ymdeimlad gwell o le a chynyddu ei apêl, fel bod pobl yn falch o fyw ac o ymweld â Phowys
Rhannu'r dudalen hon
Argraffu
