Seilwaith Gwyrdd a Bioamrywiaeth: Canllawiau i Berchnogion Tai

Beth yw pwrpas y canllawiau hyn?

Mae'r canllawiau hyn ar gyfer perchnogion tai ym Mhowys sy'n cyflwyno ceisiadau cynllunio ar gyfer:

Estyniadau
Adeiladau allanol
Anheddau sengl
Gwaith tirlunio
Pyllau nofio
Cymeradwyaethau amaethyddol ymlaen llaw
Newidiadau ar raddfa fach gydag effeithiau allanol

Beth yw Seilwaith Gwyrdd?

Seilwaith Gwyrdd yw'r rhwydwaith o nodweddion naturiol a lled-naturiol sy'n cysylltu lleoedd ac yn cefnogi bioamrywiaeth. Mae'n cynnwys y canlynol:

Nodweddion ar raddfa fawr fel afonydd, gwlyptiroedd a choetiroedd
Nodweddion lleol fel parciau, gerddi, gwrychoedd, pyllau a hawliau tramwy cyhoeddus
Elfennau ar raddfa fach fel coed stryd, toeau gwyrdd, ardaloedd blodau gwyllt a waliau byw

Pam mae angen Datganiad Seilwaith Gwyrdd?

O dan Bolisi Cynllunio Cymru (Argraffiad 12), rhaid i bob cais cynllunio gynnwys Datganiad Seilwaith Gwyrdd. Dylai hwn wneud y canlynol:

Bod yn gymesur â graddfa'r datblygiad
Nodi nodweddion Seilwaith Gwyrdd a bioamrywiaeth presennol ar y safle neu gerllaw'r safle
Esbonio sut y bydd y datblygiad yn amddiffyn, yn gwella, neu'n adfer y nodweddion hyn

Beth yw Asesiad Seilwaith Gwyrdd?

Mae Asesiad Seilwaith Gwyrdd yn nodi'r asedau gwyrdd a bioamrywiaeth ar neu o amgylch eich eiddo. Gallai'r rhain gynnwys y canlynol:

Coed, gwrychoedd, llwyni
Ardaloedd blodau gwyllt, glaswelltir, pyllau
Perllannau, coetir neu brysgwydd

Mae'r asesiad yn eich helpu i ddeall sut y gallai eich datblygiad effeithio ar y nodweddion hyn a sut i ddylunio'ch prosiect i'w hamddiffyn neu eu gwella.

Dull Cam wrth Gam

Wrth baratoi eich Datganiad Seilwaith Gwyrdd, dilynwch y dull chwe cham hwn:

Osgoi
Cynlluniwch eich prosiect i osgoi niweidio cynefinoedd neu nodweddion gwerthfawr (ee ailgyfeirio mynediad, amddiffyn gwreiddiau coed, osgoi pyllau neu glwydfannau ystlumod).
Lleihau
Os na ellir osgoi niwed, dylid lleihau'r effaith trwy gadw nodweddion, cynnal cysylltedd cynefinoedd, a chynllunio ar gyfer ôl-ofal.
Lliniaru / Adfer
Atgyweiriwch unrhyw ddifrod drwy blannu coed, gwrychoedd, neu flodau gwyllt, ac ychwanegu nodweddion fel blychau adar/ystlumod, toeau gwyrdd, neu erddi glaw.
Digolledu ar y safle
Os yw'r effeithiau'n parhau, darparwch nodweddion cynefin neu Seilwaith Gwyrdd ychwanegol ar y safle, gyda chynlluniau ar gyfer eu gofal hirdymor.
Digolledu oddi ar y safle
Fel dewis olaf, darparwch welliannau Seilwaith Gwyrdd cyfatebol oddi ar y safle, gyda chynlluniau rheoli priodol.
Gwrthod
Os yw'r datblygu yn achosi niwed sylweddol i fioamrywiaeth neu Seilwaith Gwyrdd na ellir mynd i'r afael â nhw, gellir gwrthod caniatâd cynllunio.

Beth i'w Gynnwys yn Eich Datganiad Seilwaith Gwyrdd

Dylai eich datganiad ddisgrifio'n fyr y canlynol:

Y nodweddion Seilwaith Gwyrdd a bioamrywiaeth presennol ar eich safle neu gerllaw'r safle
Sut y gallai eich datblygiad effeithio arnynt
Y camau y byddwch yn eu cymryd i osgoi, lleihau neu liniaru niwed
Unrhyw welliannau y byddwch yn eu cynnwys i gefnogi bioamrywiaeth

Nid oes angen i hyn fod yn gymhleth—dim ond yn glir ac yn feddylgar.