Ysgol Bro Caereinion - Penodi Pennaeth Dros Dro

27 Mehefin 2025

Mae uwch swyddog addysg Cyngor Sir Powys wedi'i phenodi'n bennaeth dros dro ysgol bob oed yng ngogledd Powys, gan ddod â chyfoeth o brofiad ac arweinyddiaeth i'r rôl.

Mae Anwen Orrells wedi ei phenodi'n Bennaeth Dros Dro Ysgol Bro Caereinion yn dilyn proses recriwtio helaeth a oruchwylir gan gorff llywodraethu'r ysgol.

Mae Mrs Orrells yn siarad Cymraeg yn rhugl gyda dros 30 mlynedd o brofiad mewn addysg, gan gynnwys dros 16 mlynedd mewn arweinyddiaeth addysgol, cynllunio'r cwricwlwm, a gwella ysgolion. Ar hyn o bryd, hi yw Pennaeth Dysgu a Gwella Ysgolion Cyngor Sir Powys ac Arweinydd Strategol Partneriaeth Addysg Canolbarth Cymru.

Mae ei rolau blaenorol yn cynnwys Rheolwr Gwasanaeth ar gyfer y Gwasanaeth Cymorth Addysg a Chynghorydd Herio Ysgolion Uwchradd gyda'r cyngor yn ogystal ag uwch swyddi arweinyddiaeth yn Ysgol Uwchradd Caereinion ac fel athro yn Ysgol Uwchradd Llanfair-ym-Muallt.

Dywedodd Myfanwy Alexander, Cadeirydd Llywodraethwyr Ysgol Bro Caereinion: "Mae'n bleser gennyf gyhoeddi ein bod ni wedi cynnig swydd Pennaeth Dros Dro i Mrs Anwen Orrells ac mae hi wedi derbyn y cynnig.

"Fel wyneb cyfarwydd i lawer yng nghymuned yr ysgol, mae Mrs Orrells yn cyfuno gwybodaeth strategol, sgiliau arwain a doniau heb eu hail fel athro. Mae gan y Corff Llywodraethu'r ffydd fwyaf ynddi ac rydym yn sicr ei bod fel pennaeth profiadol dros ben â'r weledigaeth a all arwain yr ysgol at ddyfodol cyffrous a llwyddiannus."

Wrth sôn am ei phenodiad, dywedodd Mrs Orrells: "Rwy'n falch iawn o ddechrau fy rôl fel Pennaeth a gweithio mewn partneriaeth agos â disgyblion, staff, rhieni a llywodraethwyr.

"Gyda'n gilydd, byddwn yn adeiladu ar gryfderau niferus yr ysgol i sicrhau bod pob dysgwr yn cael y cyfle i ffynnu. Rwyf wedi ymrwymo i feithrin amgylchedd dysgu cadarnhaol, cynhwysol ac uchelgeisiol i bawb, wrth i ni barhau â'n taith ar hyd y continwwm iaith tuag at ddod yn ysgol wirioneddol ddwyieithog."

Dywedodd y Cynghorydd Pete Roberts, Aelod Cabinet Cyngor Sir Powys ar gyfer Powys sy'n Dysgu: "Mae Anwen yn dod â chyfoeth o brofiad a hanes cadarn o arweinyddiaeth addysgol i'w rôl newydd fel Pennaeth Dros Dro Ysgol Bro Caereinion.

"Bydd ei dealltwriaeth ddofn o'r tirlun addysg leol yn ased gwerthfawr i gymuned yr ysgol. 

"Edrychaf ymlaen at barhau i weithio ochr yn ochr ag Anwen a chymuned gyfan Ysgol Bro Caereinion wrth i ni ymdrechu i wella deilliannau addysgol i bob dysgwr. Gyda'n gilydd, rydym yn ymroddedig i hyrwyddo taith yr ysgol ar hyd y continwwm iaith a chyflawni'r nodau yn ein Cynllun Strategol Cymraeg mewn Addysg."