Dyfarnu statws noddfa i ysgol uwchradd ym Mhowys

3 Gorffennaf 2025

Mae ysgol uwchradd yn ne Powys wedi cael ei llongyfarch gan y cyngor sir gan mai hi yw'r ysgol uwchradd gyntaf yn y sir i ennill statws Ysgol Noddfa am feithrin diwylliant diogel a chroesawgar.

Mae Ysgol Uwchradd Aberhonddu wedi derbyn Gwobr Ysgol Noddfa, sy'n cydnabod yr ysgolion hynny sy'n mynd y tu hwnt i feithrin diwylliant o groeso, cynhwysiant a chefnogaeth i bobl sy'n chwilio am noddfa, gan gynnwys ffoaduriaid a cheiswyr lloches.

Mae'r ysgol wedi cynnal amrywiaeth eang o weithgareddau i lywio ac ymgorffori'r ethos y tu ôl i Ysgolion Noddfa.

Mae disgyblion ym mhob cyfnod allweddol o'r cwricwlwm yn dysgu am fudo, hanes ffoaduriaid a'r hyn y mae'n ei olygu i chwilio am noddfa. Maen nhw wedi clywed areithiau a chael gweithdai ysbrydoledig gan bobl sydd wedi derbyn noddfa'n llwyddiannus.

Mae'r disgyblion hefyd wedi codi arian ar gyfer elusen ffoaduriaid leol ac elusen yn yr Wcráin ac maent yn cymryd rhan weithredol yn y broses gyfan.

Llongyfarchodd y Cynghorydd Pete Roberts, Aelod Cabinet Cyngor Sir Powys ar gyfer Powys sy'n Dysgu, yr ysgol ar eu cyflawniad.

"Rydym yn hynod falch o Ysgol Uwchradd Aberhonddu am arwain y ffordd ym Mhowys. Mae'r wobr hon yn adlewyrchiad pwerus o ymroddiad yr ysgol i dosturio, cynhwysiant a'r gymuned," meddai'r Cynghorydd Roberts.

"Mae'n gosod esiampl wych i ysgolion eraill yn y sir ac yn dangos yr hyn y gellir ei gyflawni pan fyddwn ni'n cydweithio i greu mannau diogel a chroesawgar i bob dysgwr."

Mae Gwobr Ysgol Noddfa yn rhan o fudiad cenedlaethol sy'n tyfu, gyda dros 600 o ysgolion ledled y DU bellach yn cael eu cydnabod am eu hymdrechion i gefnogi ceiswyr noddfa.