Cyfle newydd i faethu plant a phobl ifanc ym Mhowys

29 Gorffennaf 2025

Mae math unigryw o ofal maeth ym Mhowys yn cynnig dros £19,000 a mwy i ofalwyr, y cyntaf o'i fath yng Nghymru.

Fel gofalwr maeth myfyriol, byddwch ar alwad i ddarparu cymorth ar unwaith i blant a phobl ifanc pan fo'i angen fwyaf.

Byddwch yn derbyn dros £19,000 y flwyddyn am fod ar gael, ynghyd â £250 yr wythnos pan fydd plentyn yn eich gofal. Mae'r rhan fwyaf o'ch taliad yn ddi-dreth, a byddwch yn derbyn pum wythnos o wyliau blynyddol, cymorth 24 awr a hyfforddiant arbenigol.

Dywedodd yr Aelod Cabinet dros Genedlaethau'r Dyfodol, y Cynghorydd Sandra Davies: "Os ydych chi'n angerddol am ofalu a chefnogi plant a phobl ifanc pan fyddant yn mynd drwy gyfnod anodd, yna gallai hyn fod yn gyfle gwych i chi."

"Mae'r math newydd hwn o ofal maeth yn golygu bod ar gael ar ddiwedd y ffôn a darparu gofal pan fo angen cartref tymor byr ar blentyn neu berson ifanc. Fel Gofalwr Maeth Myfyriol, byddwch yn derbyn incwm rheolaidd p'un a yw plentyn yn cael ei leoli gyda chi ai peidio."

"Mae dod yn ofalwr maeth yn heriol, ond yn hynod o werthfawr, mae'r effaith y gallwch chi ei chael ar fywyd plentyn yn aruthrol. Nid yn unig ydych chi'n darparu amgylchedd diogel ac anogol, ond rydych hefyd yn helpu i lunio eu dyfodol, gan gynnig sefydlogrwydd a chefnogaeth iddynt yn ystod cyfnod hanfodol yn eu bywydau."

Os oes gennych ddiddordeb mewn dod yn ofalwr maeth ar gyfer lleoliadau myfyriol, tymor byr neu hirdymor, cysylltwch â ni. Mae ein tîm maethu allan o gwmpas y lle yr haf hwn, felly galwch heibio i'w gweld mewn digwyddiad sy'n cael ei gynnal yn agos atoch chi:

• 1 Awst, Costa Aberhonddu, 11am - 2pm

• 5 Awst, Diwrnod Chwarae Llandrindod, 10am - 12:30pm

• 6 Awst, Diwrnod Chwarae Y Trallwng yng Nghanolfan Integredig i Deuluoedd Y Trallwng, 11 am - 1 pm

• 13 Awst, Canolfan Integredig i Deuluoedd Newtown, 11am-2pm
• 14 Awst, Y Gorsedd, Ystradgynlais, 11am - 2pm

• 15 Awst, Y Llyn, Llandrindod, 11am - 12:30pm

• 21 Awst, Ffair Hwyl a Gwybodaeth, Y Drenewydd, 10am - 2pm

Fel arall, gallwch ddysgu mwy yn fostering@powys.gov.uk, neu cysylltwch a'n tim cyfeillgar ar fostering@powys.gov.uk / 0800 22 30 627.