Dathlu wrth i Estyn ganmol cynnydd ysgol

10 Medi 2025

Mae athrawon a disgyblion mewn ysgol gynradd yng ngogledd Powys yn dathlu carreg filltir bwysig yn dilyn adroddiad cadarnhaol gan Estyn.

Mae Ysgol Gynradd Tre'r Llai wedi cael ei thynnu'n swyddogol oddi ar restr Estyn, arolygiaeth addysg a hyfforddiant Cymru, o ysgolion y mae angen gwella sylweddol arnynt.

Mae penderfyniad Estyn, sydd wedi cael ei groesawu gan Gyngor Sir Powys, yn benllanw misoedd o waith caled, o gydweithio, ac ymrwymiad i newid cadarnhaol.

Yn ystod eu hymweliad monitro ym mis Gorffennaf, canfu Estyn fod yr ysgol wedi gwneud cynnydd digonol wrth fynd i'r afael â phryderon blaenorol.

Mae gweithdrefnau diogelu wedi'u cryfhau'n sylweddol, gan greu amgylchedd diogel sy'n cael ei reoli'n dda. Mae arweinyddiaeth a hunanwerthuso wedi gwella, gyda staff yn gweithio ar y cyd a llywodraethwyr yn chwarae rôl fwy gweithredol.

Mae ansawdd yr addysgu wedi datblygu, yn enwedig mewn mathemateg a chymhwysedd digidol, gyda disgyblion yn dangos mwy o hyder ac ymgysylltiad. Er bod ysgrifennu'n parhau i fod yn faes i'w ddatblygu, yn enwedig ymhlith disgyblion hŷn, mae'r cwricwlwm bellach yn cynnig cyfleoedd dysgu mwy ystyrlon, ac mae disgyblion yn datblygu mwy o annibyniaeth a balchder yn eu gwaith.

Dywedodd y Cynghorydd Pete Roberts, Aelod Cabinet Cyngor Sir Powys ar gyfer Powys sy'n Dysgu: "Mae hyn yn newyddion gwych i Ysgol Gynradd Tre'r Llai ac yn dyst i ymroddiad pawb sy'n gysylltiedig â'i siwrnai gwella.

"Mae'r cynnydd a wnaed o ran diogelu, arweinyddiaeth, ansawdd addysgu a chanlyniadau disgyblion yn drawiadol. Rwy'n arbennig o falch o weld y cydweithio cryfach rhwng yr ysgol a'r cyngor, sydd wedi helpu i greu amgylchedd dysgu mwy diogel ac effeithiol i ddisgyblion.

"Byddwn yn parhau i weithio gyda'n gilydd i adeiladu ar y llwyddiannau hyn a sicrhau gwelliant parhaus ar gyfer y dyfodol."

Ychwanegodd Mrs Lindsay Clarke, Pennaeth Dros Dro Ysgol Tre'r Llai: "Rydym wrth ein bodd gyda chydnabyddiaeth Estyn o'r cynnydd rydym wedi'i wneud. Mae'r canlyniad hwn yn adlewyrchu ymdrech gyfunol ein staff, llywodraethwyr, disgyblion a theuluoedd.

"Rydym wedi gweithio'n galed i adeiladu diwylliant diogelu cryf, i wella addysgu a dysgu, a sicrhau bod ein disgyblion yn cael eu cefnogi i ffynnu.  Rydym yn parhau i fod yn ymrwymedig i barhau â'r daith hon o welliant a darparu'r addysg orau bosibl i'n plant."