Gwaith diogelwch i'w wneud ar gofebion simsan ym mynwentydd y cyngor

15 Hydref 2025

Cyn bo hir, bydd cofebion a nodwyd yn simsan yn ystod archwiliad o fynwentydd Cyngor Sir Powys yn cael eu gwneud yn ddiogel - naill ai drwy gael eu gosod yn wastad neu drwy eu diogelu â dulliau priodol eraill - er mwyn sicrhau bod y mannau hyn yn parhau i fod yn ddiogel i ymwelwyr.

Yn gynharach eleni, bu'r cyngor yn goruchwylio rhaglen archwilio cofebion ar draws ei fynwentydd, gyda chofebion yn cael eu hasesu a'u gosod mewn un o dri chategori:

• Categori 1 (Coch): Anniogel ac angen sylw ar unwaith
• Categori 2 (Ambr): Simsan ond ddim yn risg yn y tymor buan
• Categori 3 (Gwyrdd): Sefydlog a dim angen gweithredu

Gwnaed cofebion Categori 1 yn ddiogel ar adeg yr archwiliad, a rhoddwyd hysbysiadau coch dwyieithog arnynt.

Marciwyd cofebion Categori 2 gyda hysbysiadau ambr dwyieithog, i nodi eu bod yn simsan a bod angen eu hatgyweirio. Os na chafodd y cofebion hyn eu hatgyweirio o fewn chwe mis i'r archwiliad, byddent yn cael eu gosod yn wastad neu'n cael eu diogelu mewn ffyrdd priodol eraill.

Mae'r cyfnod hwn o chwe mis bellach wedi pasio. O fis Tachwedd ymlaen, bydd contractwr y cyngor yn dechrau ailymweld â chofebion Categori 2 i wneud y gwaith hwn.

Bydd arwyddion gwybodaeth dwyieithog yn cael eu gosod wrth fynedfeydd y fynwent cyn dechrau'r gwaith i hysbysu ymwelwyr.

Meddai'r Cynghorydd Richard Church, Aelod Cabinet Powys Fwy Diogel: "Rydym yn deall pa mor bwysig yw cofebion i deuluoedd, ac rydym am roi pob cyfle i bobl wneud y gwaith atgyweirio angenrheidiol. Fodd bynnag, rhaid i ni hefyd sicrhau bod ein mynwentydd yn parhau i fod yn fannau diogel i bawb ymweld â nhw.

"Os nad yw cofeb Categori 2 wedi'i hatgyweirio, ni fydd gennym ddewis ond ei gosod yn wastad neu ei gwneud yn ddiogel mewn ffordd arall."

I gael rhagor o wybodaeth, cysylltwch â Gwasanaeth Diogelu'r Amgylchedd yn y cyngor drwy ebostio environmental.protection@powys.gov.uk neu ffonio 01938 551300.