Arweinydd y cyngor yn diolch i fusnesau Powys am adeiladu economi ddeinamig
23 Hydref 2025
Roedd y Cynghorydd Jake Berriman, sydd hefyd yn aelod o gabinet y cyngor ar gyfer pobl, perfformiad a phartneriaethau, yn siarad yng nghinio blynyddol Gwobrau Busnes Powys a gynhaliwyd yn yr Hafren, Y Drenewydd nos Wener ddiwethaf.
Mae Cyngor Sir Powys yn noddwr y gwobrau, a drefnir gan Grŵp Gweithgynhyrchu Canolbarth Cymru (MWMG).
"Rydym yn edrych yn eiddgar i'r dyfodol ac rwy'n falch bod Cyngor Sir Powys unwaith eto'n noddi'r digwyddiad gwych hwn. Nid tlysau a theitlau yn unig sy'n bwysig, mae'n ymwneud â phobl a phosibilrwydd a chreadigrwydd, y dewrder a'r penderfyniad sy'n diffinio'r gymuned fusnes yma ym Mhowys.
"Ein busnesau lleol, o fentrau teuluol i arloeswyr sy'n tyfu'n gyflym, yw anadl einioes ein heconomi. Rydych chi'n ysgogi twf, yn creu cyfleoedd ac yn helpu ein cymunedau i ffynnu. Gyda'ch gilydd, rydych yn llunio Powys gryfach, decach a mwy cynaliadwy.
"Dros y flwyddyn ddiwethaf, rydym wedi gweld enghreifftiau anhygoel o uchelgais a chydnerthedd - mentrau newydd a anwyd o syniadau beiddgar, cwmnïau sefydledig sy'n croesawu arloesedd ac unigolion niferus yn troi heriau'n gyfleoedd.
"Rydym hefyd wedi gweld cynnydd gwirioneddol drwy fentrau sydd wedi'u cynllunio i ddatgloi twf a buddsoddiad ar draws y rhanbarth."
Gwahoddwyd saith busnes llwyddiannus o'r sir i fwrw ymlaen â cheisiadau ar gyfer Cronfa Eiddo Masnachol y Canolbarth, a ddisgrifiodd fel "arwydd cryf o hyder ac o'r cyfeiriad cyffrous y mae ein heconomi leol yn mynd iddo".
Soniodd y Cynghorydd Berriman hefyd am lansiad cadarnhaol Grant Twf Cyfalaf sy'n helpu busnesau Powys i fuddsoddi, ehangu ac arloesi. "Mae'r grant hwn yn ymwneud â rhoi'r dulliau a'r cymorth sydd eu hangen ar entrepreneuriaid i droi syniadau'n gamau gweithredu a thwf yn swyddi," ychwanegodd.
"Rydym yn edrych i'r dyfodol gyda chynlluniau ar gyfer datblygu parciau busnes newydd a chanolfan weithgynhyrchu uwch, cam mawr ymlaen o ran creu'r seilwaith cywir ar gyfer menter, arloesi a chyflogaeth gwerth uchel yn y Canolbarth.
"Mae'r prosiectau hyn yn dangos ein hymrwymiad i adeiladu economi fodern, ddeinamig sy'n gweithio i bawb.
"Nid yw hanner y swyddi y gallai pobl ifanc fod yn eu gwneud yn y 10 mlynedd nesaf wedi cael eu dyfeisio eto. Mae'r bobl sydd yn yr ystafell hon heno yn allweddol i greu cyfleoedd ar gyfer y genhedlaeth nesaf."
Diolchodd i enillwyr y gwobrau, y rhai a gyrhaeddodd y rownd derfynol ac enwebeion am eu brwdfrydedd i wthio ffiniau, eu hymrwymiad cymunedol a'u gweledigaeth i wneud Powys yn fan lle mae menter yn ffynnu.
"Fel cyngor, rydym yn falch o weithio ochr yn ochr â chi, gan gefnogi arloesedd, cynaliadwyedd a chynhwysiant ar draws ein trefi a'n cymunedau gwledig," ychwanegodd y Cynghorydd Berriman. "Mae'r gwerthoedd hyn wrth wraidd ein gweledigaeth gyffredin ar gyfer dyfodol Powys.
"Mae eich llwyddiant yn goleuo'r ffordd i eraill, gan ysbrydoli'r genhedlaeth nesaf o entrepreneuriaid i gael breuddwydion mawr ac i wneud eu marc yma ym Mhowys. Diolch am bopeth ry'ch chi'n ei wneud i wneud ein sir yn lle o gyfleoedd a balchder."
Llun: Y Cynghorydd Jake Berriman, arweinydd Cyngor Sir Powys, yn annerch cynulleidfa Gwobrau Busnes Powys.
Rhannu'r dudalen hon
Argraffu
