Trigolion Powys yn cael eu hannog i weithredu ar rybudd diogelwch brys am beiriannau sychu dillad
11 Rhagfyr 2025
Rhaid i aelwydydd sydd â modelau penodol o beiriannau sychu dillad sydd â pympiau gwres integredig a gynhyrchir gan Haier wirio a oes angen atgyweirio eu peiriant ar frys oherwydd y risg o dân. Mae'r rhybudd diogelwch am y cynnyrch yma wedi'i gyhoeddi gan y Swyddfa Diogelwch a Safonau Cynnyrch.
Ymhlith y brandiau yr effeithir arnynt mae Baumatic, Candy, Caple, Haier, Hoover, Lamona, Iberna a Montpellier.
Bellach, mae Gwasanaeth Safonau Masnach Cyngor Sir Powys yn annog aelwydydd a all fod ag un o'r peiriannau yr effeithir arnynt i wneud y canlynol:
- Rhowch y gorau i ddefnyddio unrhyw sychwr dillad sydd wedi'i effeithio ar unwaith
- Dad-blygiwch y peiriant os yw'n ddiogel ac yn hygyrch
- Gwiriwch y model a'r rhif cyfresol drwy wiriwr ar-lein y gwneuthurwr
- Cysylltwch â'r gwneuthurwr i drefnu atgyweiriad am ddim cyn defnyddio'r peiriant eto
Dywedodd y Cynghorydd Richard Church, Aelod Cabinet ar gyfer Gwasanaethau Cyfreithiol a Rheoleiddio: "Rydym yn annog unrhyw un sy'n berchen ar un o'r peiriannau sychu dillad hyn i weithredu ar unwaith.
"Gall nam ddigwydd ar y cylched mewnol wrth i chi ei ddefnyddio, gan achosi i'r sychwr dillad gynnau a chychwyn tân yn eich cartref.
"Mae'n cymryd ychydig funudau i wirio os yw eich sychwr dillad wedi'i effeithio. Edrychwch am eich model a'ch rhif cyfresol, a naill ai ei wirio ar-lein neu cysylltwch â'r gwneuthurwr i weld a oes angen atgyweirio eich peiriant am ddim.
"Peidiwch â defnyddio eich sychwr dillad nes bod y gwaith atgyweirio wedi'i gwblhau."
Am fwy o wybodaeth ewch i https://www.gov.uk/government/news/urgent-safety-check-for-85000-tumble-dryers
Rhannu'r dudalen hon
Argraffu
