O gysylltiadau cymunedol i lwyddiant iaith arwyddion - cydnabod lleoliadau blynyddoedd cynnar Powys am ragoriaeth
17 Rhagfyr 2025
Canmolwyd Cylch Meithrin Machynlleth am greu cysylltiadau cymunedol cryf sy'n darparu profiadau addysgol cyfoethog, ystyrlon i ddysgwyr ifanc. Canfu arolygwyr fod y partneriaethau hyn yn cefnogi sgiliau cymdeithasol ac emosiynol plant yn effeithiol, yn ehangu eu profiadau, ac yn creu cyfleoedd sy'n mynd y tu hwnt i'r ystafell ddosbarth, gan helpu plant i ffynnu mewn amgylchedd cefnogol.
Mae astudiaeth achos Estyn o arferion effeithiol yn esbonio sut mae'r lleoliad yn gweithio'n agos gyda sefydliadau a theuluoedd lleol i ddarparu gweithgareddau sy'n cryfhau llesiant a datblygiad personol.
Yn y cyfamser, canmolwyd Ysgol Feithrin y Trallwng Cyf am ei defnydd effeithiol o iaith arwyddion i annog sgiliau cyfathrebu plant. Mae ymarferwyr yn ymgorffori iaith arwyddion yn nhrefn arferol a gweithgareddau dyddiol, gan helpu'r plant i fynegi eu hunain yn hyderus ac i ddatblygu sgiliau iaith cryf. Mae'r dull cynhwysol hwn yn cefnogi pob dysgwr, gan gynnwys y rhai ag anghenion dysgu ychwanegol, ac yn hyrwyddo rhyngweithio cadarnhaol ymhlith y plant.
Dywedodd y Cynghorydd James Gibson-Watt, Aelod Cabinet dros Bowys sy'n Dysgu: "Mae'r gydnabyddiaeth hon gan Estyn yn amlygu'r gwaith rhagorol sy'n cael ei wneud yng Nghylch Meithrin Machynlleth ac Ysgol Feithrin y Trallwng Cyf.
"Mae eu dulliau yn dangos sut y gall partneriaethau cymunedol cryf a strategaethau cyfathrebu arloesol wneud gwahaniaeth gwirioneddol i ddatblygu, llesiant a hyder plant.
"Rydym wedi ymrwymo i gefnogi ein holl leoliadau blynyddoedd cynnar i gyflawni'r gorau i deuluoedd Powys, ac mae'r enghreifftiau hyn yn dangos y safonau uchel rydym yn anelu at eu cyflawni ar draws y sir."
I ddarllen astudiaeth achos o arferion effeithiol Cylch Meithrin Machynlleth, ewch i Cysylltiadau cymunedol cadarn sy'n cefnogi medrau cymdeithasol, emosiynol a phrofiadau ehangach plant yn hynod effeithiol - Estyn
I ddarllen astudiaeth achos o arferion effeithiol Ysgol Feithrin y Trallwng Cyf, ewch i Defnydd effeithiol yr ymarferwyr o iaith arwyddo er mwyn annog medrau cyfathrebu'r plant. - Estyn
Rhannu'r dudalen hon
Argraffu
