Cynnal a Chadw Ffyrdd Powys dros y Gaeaf
5 Ionawr 2025
Yn dibynnu ar ragolwg manwl a data gan synwyryddion tymheredd, gwneir y penderfyniadau i aredig a graeanu ffyrdd Powys yn ôl yr angen, gyda chriwiau'n gwneud hyd at dri rhediad wedi'u trefnu y dydd ac yn aros ar rota wrth gefn 24/7 i ail-raeanu yn ôl yr angen. Mae fflyd y lorïau graeanu yn teithio dros 1,400km bob tro y byddant yn graeanu prif ffyrdd a llwybrau'r sir.
Rhwng graeanu ffyrdd, mae ein criwiau yn brysur yn trin llwybrau troed yng nghanol trefi, y tu allan i ysgolion, cartrefi gofal, canolfannau meddygol ac ati. Rydym hefyd yn canolbwyntio ar ailstocio ein cronfeydd wrth gefn o raean ac ail-lenwi biniau halen ledled y sir cyn gynted â phosibl.
"Mae ein criwiau priffyrdd yn gweithio o amgylch y cloc ym mhob tywydd i drin a chlirio prif ffyrdd y sir yn ogystal â graeanu llwybrau yng nghanol ein trefi a thu allan i amwynderau hanfodol fel ysgolion a chyfleusterau meddygol." Esboniodd y Cynghorydd Jackie Charlton, Aelod Cabinet ar gyfer Powys Wyrddach.
"Yn ogystal â'n fflyd o lorïau graeanu sy'n trin y prif lwybrau, mae bron i 3,300 o finiau halen wedi'u lleoli ledled y sir i helpu cymunedau i drin ffyrdd a phalmentydd lleol. Mae'r biniau hyn yn cael eu gosod lle na all lorïau graeanu gyrraedd - bryniau serth, mynediadau cul, mannau gwledig, mannau a rennir, ac ati. Gallwch wirio lleoliadau'r biniau halen a gofyn am eu hail-lenwi ar-lein.
"Er bod amodau'r tywydd yn parhau i fod yn oer, byddwch yn ofalus pan fyddwch y tu allan a chaniatáu amser ychwanegol ar gyfer teithiau."
Sylwch na all aelodau'r cyhoedd gasglu halen yn uniongyrchol o depos. Gallwch ddod o hyd i'ch bin halen agosaf, a rhowch wybod i ni os oes angen ei ail-lenwi, yma: Lleoliadau Biniau Halen
Dysgwch fwy am sut rydym yn trin ffyrdd yn ystod y gaeaf yma: Graeanu yn y Gaeaf
Yn ystod tywydd eithafol, byddwn yn aml yn darparu diweddariadau cyflym i'r cyhoedd drwy'r cyfryngau cymdeithasol. I gael y wybodaeth ddiweddaraf, gallwch ddilyn ein tudalennau Facebook yma:
- Powys County Council - https://www.facebook.com/powyscc/
- Cyngor Sir Powys - https://www.facebook.com/cspowys/
- Priffyrdd, Trafnidiaeth ac Ailgylchu Cyngor Sir Powys - https://www.facebook.com/PowysHighwaysTransportRecycling/
Rhannu'r dudalen hon
Argraffu
