Arweinydd yn croesawu Tour De France i Bowys
15 Ionawr 2026
Cafodd enwi'r sir yn gartref i drydydd diwrnod (sef diwrnod olaf) Grand Départ y daith yn 2027 ei groesawu fel cyfle hanesyddol i arddangos y sir a rhoi chwistrelliad enfawr i'w heconomi.
Meddai'r Cynghorydd Jake Berriman ar ôl y cyhoeddiad swyddogol yng Nghastell Powys: "Does dim anrhydedd mwy yn y byd beicio na chynnal Grand Départ y Tour de France. Ers iddo ddechrau gadael Ffrainc yn y 1950au, mae'r Tour de France wedi dechrau dramor ar 26 achlysur, gan ymweld ag Iwerddon, yr Eidal, yr Almaen a Lloegr ar hyd y ffordd - ond dyma'r cymal cyntaf i gael ei gynnal yng Nghymru.
"Mae Powys yn gyfarwydd iawn â chynnal digwyddiadau beicio mawr ar ôl mwynhau sawl digwyddiad o gymalau Tour of Britain ynghyd â Thaith y Merched. Cynhyrchodd pob un ohonynt hwb economaidd sylweddol i'r sir, yn enwedig ei sector lletygarwch, gan ddarparu llwyfan fyd-eang i arddangos y sir fel cyrchfan gwyliau.
"Y tro diwethaf i'r grand départ fod ym Mhrydain oedd yn 2014 pan ddechreuodd yng ngogledd Swydd Efrog a rhoddodd hyn hwb o £100m i'r economi.
"Bydd départ y flwyddyn nesaf yn dechrau yng Nghastell Caeredin ar 2 Gorffennaf, gydag ail gymal rhwng Keswick a Lerpwl cyn y trydydd cymal a'r olaf "o gastell i gastell" yn dechrau yn y Trallwng ar Orffennaf 4 cyn teithio trwy grombil y sir i ddiweddglo dramatig yng Nghaerdydd.
"Bydd y départ mawreddog yn rhan o haf epig i Bowys, byddwn yn cynnal y Sioe Frenhinol, Enduro Chwe Diwrnod Rhyngwladol, yr Eisteddfod Genedlaethol a'r Grant Départ o fewn ychydig wythnosau i'w gilydd.
"Bydd haf 2027 yn mynd i lawr fel cyfle unwaith mewn oes i arddangos y sir hardd hon, ei threftadaeth a'i diwylliant a gobeithio rhoi hwb enfawr i les economaidd y sir," ychwanegodd.
Yn y llun mae'r Cynghorydd Jake Berriman (canol) gyda'r Cynghorydd Graham Breeze a'r Cynghorydd Richard Church yng Nghastell Powis, yn dathlu'r foment o gyhoeddi bod Cymal 4 Grand Depart Tour De France yn dod i Bowys yn 2027.
Llun gan PA
Rhannu'r dudalen hon
Argraffu
