Heintiau Anadlol Acíwt

Diffiniad
Mae Heintiau Anadlol Acíwt yn cynnwys afiechydon megis ffliw, COVID-19, feirws syncytiol anadlol, a heintiau feirysol neu facteriol eraill sy'n effeithio ar y llwybr anadlol. Yn gyffredin, fe'u lledaenir trwy ddefnynnau a gynhyrchir pan fydd person heintiedig yn pesychu, yn tisian, neu'n siarad.

Rhagor o wybodaeth: Llawlyfr Atal Heintiau - Tudalen 69

Dull Trosglwyddo

Trosglwyddo defnynnau (o fewn 1 metr i berson heintiedig, er y gall defnynnau symud ymhellach weithiau.)
Cyswllt â dwylo, arwynebau, neu offer halogedig.
Gall gweithdrefnau sy'n cynhyrchu aerosol gynyddu'r risg o ledaenu yn yr aer.

Mae Symptomau Cyffredinol yn Cynnwys

Pesychu, tisian, trwyn sy'n rhedeg, dolur gwddf.
Twymyn, cur pen, poenau cyhyrol, blinder.
Anawsterau anadlu mewn achosion difrifol.

Rhagofalon Safonol Rheoli Heintiadau

Dylid cymhwyso Rhagofalon Safonol Rheoli Heintiadau bob amser, gan gynnwys:

Hylendid dwylo cyn ac ar ôl cyswllt â chleifion.
Hylendid anadlol a chwrteisi wrth besychu.
Defnyddio cyfarpar diogelu personol yn briodol (menig, ffedog, masg, a chyfarpar diogelu'r llygaid os oes risg o sblasio).
Rheoli gwastraff a lliain yn ddiogel.

Rhagofalon Ychwanegol sy'n Seiliedig ar Drosglwyddo

Ynysu: Dylid ynysu cleifion yr amheuir bod Heintiau Anadlol Acíwt arnynt neu gleifion y cadarnhawyd bod Heintiau Anadlol Acíwt arnynt mewn un ystafell pan fo hynny'n bosibl. Gellid ystyried trin pobl fel grŵp yn ystod brigiad o achosion.
Arwyddion: Dylid arddangos arwyddion clir ar ddrws y claf i roi gwybod i'r staff ac ymwelwyr.
Cyfarpar diogelu personol: Dylid gwisgo masgiau llawfeddygol o fewn 1 metr i glaf sy'n pesychu/tisian. Mae angen masgiau FFP3 wrth gyflawni gweithdrefnau sy'n cynhyrchu aerosol.
Glanhau amgylcheddol: Glanhau arwynebau sy'n cael eu cyffwrdd yn aml yn well â diheintyddion priodol.

Pa brofion y dylid eu cael?

Mae'n bwysig cael swabiau feirysol gan breswylwyr a/neu staff symptomatig wrth reoli afiechydon anadlol. Bydd hyn yn helpu i wneud diagnosis o'r afiechydon anadlol ac yn sicrhau bod y driniaeth gywir yn cael ei rhoi. Bydd y meddyg teulu yn rhoi cyngor ar y swabiau/profion a'r driniaeth a ddarperir.

Egwyddorion Allweddol i Leihau Lledaeniad

Cyfathrebu:

Dylai cartref gofal roi gwybod i'r Tîm Diogelu Iechyd (AWARe) os oes achos o afiechyd anadlol acíwt arwyddocaol sy'n gofyn am ynysu a gadarnhawyd neu a amheuir.
Os yw'r cartref yn cael ei ddosbarthu fel un sydd â brigiad o achosion, dylid ei gau o ran derbyniadau a dilyn gweithdrefnau rheoli brigiad.
Cysylltwch â'r Tîm Diogelu Iechyd - Gwasanaeth Ymateb Acíwt Cymru Gyfan (0300 0030 032) i gael cyngor a chanllawiau.
Os oes angen trosglwyddo preswylydd i'r ysbyty, rhowch wybod i'r gwasanaeth ambiwlans ac adran yn yr ysbyty fod gan y preswylydd symptomau afiechyd anadlol.
Cysylltu â'r Tîm Diogelu Iechyd ynghylch polisïau a rheoli brigiad o achosion.

Hylendid Dwylo:

Glanhau dwylo'n rheolaidd â sebon hylif a dŵr cynnes, neu â hylif diheintio dwylo ag alcohol os yw'n amlwg bod y dwylo'n lân.
Sicrhau bod sebon hylif a thyweli papur tafladwy ym mhob ystafell breswyl.
Annog a chynorthwyo'r preswylwyr gyda hylendid anadlol a hylendid pesychu.
Rhaid i ymwelwyr olchi eu dwylo wrth fynd i mewn ac allan o'r cartref gofal.

Ynysu:

Mae awyru da yn bwysig - agor ffenestri yn rheolaidd (e.e. 10 munud bob awr) er mwyn helpu i gael gwared ar ficro-organebau o'r aer.
Dylid gofalu am breswylwyr symptomatig mewn un ystafell, gan gadw drysau'r ystafell wely ynghau os yw'n ddiogel.
Gallai preswylwyr y cadarnhawyd bod yr un feirws arnynt gael eu trin fel grŵp mewn ardaloedd dynodedig (e.e. lloriau/esgyll ar wahân) er mwyn lleihau'r lledaeniad.
Rhaid i staff wisgo cyfarpar diogelu personol priodol (masg llawfeddygol sy'n atal hylif, cyfarpar diogelu'r llygaid, menig, ffedog) wrth ofalu am breswylwyr yr effeithir arnynt.
Dylid sefydlu gorsafoedd cyfarpar diogelu personol y tu allan i ystafelloedd preswyl.
Mae cyfnodau ynysu yn amrywio gan ddibynnu ar y feirws - gofynnwch i'r Tîm Diogelu Iechyd am gyngor.

Diheintio:

Dylid glanhau ystafell y preswylydd â diheintydd priodol bob diwrnod.
Rhaid glanhau offer gofalu amldro rhwng preswylwyr.
Dylai glanhau a diheintio ddilyn Safonau Cymru.
Golchi lliain yr effeithir arnynt fel dillad golch heintiedig.
Pan fydd y cyfnod ynysu wedi dod i ben, dylai'r ystafell gael ei glanhau'n drylwyr cyn y gellir ei hailddefnyddio.
Rhaid diheintio'r holl offer cyn eu symud o'r ystafell.
Os oes brigiad o achosion, dylid glanhau'n drylwyr yr holl ardaloedd yr effeithir arnynt yn unol â'r polisi brigiad o achosion.
Dylid golchi gwisgoedd y staff gartref ar 60°C (neu fel y cytunwyd arno gan y cartref gofal).

Nodwch - Ni ddylai staff wisgo gwisgoedd wrth fynd i'r gwaith yn y Cartref Gofal nac oddi yno

Allgáu Staff

Ni ddylai staff y mae symptomau afiechyd tebyg i'r ffliw neu COVID-19 arnynt fynd i'r gwaith nes eu bod wedi gwella'n glinigol ac yn bodloni canllawiau cyfredol y GIG/Llywodraeth Cymru.

Ymwelwyr

Yn ystod brigiad o achosion neu ddigwyddiad feirws mewn cartref gofal, dylid caniatáu i ymweliadau aros mor agored a hyblyg â phosibl heb gyfyngu ar ymweliadau nes bod asesiad risg wedi ei gynnal.
Sicrhau bod ymwelwyr yn ymwybodol eu bod yn ymdrin â brigiad o achosion.
Dylid cynghori ymwelwyr y mae symptomau arnynt i beidio â mynd i mewn i leoliadau gofal.
Rhaid i ymwelwyr ddilyn gofynion hylendid dwylo a chyfarpar diogelu personol.

Adnoddau
Poster Cartrefi Gofal Ffliw y GIG: Poster-ofal-gwirofflu.pdf

Cyfeiriadau a Dolenni ar gyfer Canllawiau Ychwanegol:
Heintiau Anadlol Acíwt Iechyd Cyhoeddus Cymru: Heintiau Anadlol Acíwt - Iechyd Cyhoeddus Cymru