Llongyfarch Ysgol Gynradd Pontffranc ar adroddiad rhagorol gan Estyn

13 Chwefror 2026

Cafodd Ysgol Gynradd Pontffranc ei llongyfarch gan Gyngor Sir Powys ar ôl derbyn adroddiad arolwg rhagorol gan Estyn sy'n tynnu sylw at ethos gofalgar, diwylliant cynhwysol, a datblygiad personol cryf ei disgyblion.

Disgrifiwyd yr ysgol gan arolygwyr Estyn fel ysgol groesawgar a gofalgar ynghanol ei chymuned wledig, lle mae disgyblion yn tyfu'n unigolion ystyriol, hyderus sydd wedi'u paratoi'n dda ar gyfer camau nesaf eu dysg a'u bywyd.

Fel rhan o'r adroddiad, a gyhoeddwyd fis diwethaf (Ionawr), canfu arolygwyr fod bron pob disgybl yn mwynhau'r ysgol, yn ymddwyn yn barchus ac yn garedig, ac yn dangos empathi a chydweithrediad mewn gwersi ac wrth chwarae.

Canmolodd Estyn gwricwlwm uchelgeisiol a chreadigol yr ysgol, sy'n defnyddio profiadau ymarferol, go iawn a dynnir o'r ardal leol, hunaniaeth Gymreig, a'r byd ehangach i wneud dysgu yn ystyrlon. Mae'r adroddiad hefyd yn tynnu sylw at gynnydd cryf o ran sgiliau llythrennedd, digidol a Chymraeg disgyblion, ochr yn ochr â dull hynod effeithiol a sefydledig o gefnogi disgyblion ag anghenion dysgu ychwanegol.

Nododd arolygwyr hefyd ffocws pwrpasol yr ysgol ar lesiant, gyda disgyblion yn ymgymryd â chyfrifoldebau ystyrlon, ffyrdd iach o fyw, a chyfrannu'n gadarnhaol at arferion yr ysgol - gan gryfhau eu hyder, eu hannibyniaeth a'u parodrwydd ar gyfer y dyfodol ymhellach.

Dywedodd y Cynghorydd James Gibson-Watt, Aelod Cabinet dros Bowys sy'n Dysgu: "Mae Ysgol Pontffranc wedi cyflawni rhywbeth gwirioneddol arbennig, ac mae'r adroddiad hwn gan Estyn yn cyfleu'r effaith ryfeddol y mae'r ysgol yn ei chael ar ei dysgwyr. Mae cryfder ei chymuned, y gofal a ddangosir i bob plentyn, a'r profiadau dysgu cyfoethog sydd ar gael yn amlwg yn helpu disgyblion i dyfu, ffynnu a llwyddo.

"Rwy'n arbennig o falch o weld llwyddiant yr ysgol wrth ddatblygu sgiliau llythrennedd, digidol a Chymraeg disgyblion, a'r gefnogaeth hynod effeithiol sydd ar waith i ddysgwyr ag anghenion ychwanegol. Mae hyn yn adlewyrchu ymrwymiad i roi cyfle i bob plentyn lwyddo ac i sicrhau bod ein dysgwyr ym Mhowys yn derbyn addysg a chefnogaeth o'r ansawdd uchel y maent yn ei haeddu.

"Fel cyngor, rydym yn canolbwyntio ar roi'r dysgwr wrth wraidd popeth a wnawn, ac mae Pontffranc yn enghraifft bwerus o sut y gall y weledigaeth honno ddod yn fyw. Diolch i gymuned yr ysgol gyfan am eich ymroddiad i ddarparu'r gorau i'ch disgyblion."