Partneriaeth ranbarthol yn cymryd sedd wrth ford gron genedlaethol ar natur a thwf economaidd

21 Mai 2026

Mae cynrychiolwyr o Bartneriaeth y Gororau Ymlaen wedi cymryd rhan mewn bord gron ar bolisiau cenedlaethol sy'n archwilio sut y gellir cyflawni natur a thwf economaidd gyda'i gilydd.

Arweiniwyd y Ford Gron ar Fuddsoddiad Cydweithredol y Sector Preifat mewn Gwydnwch a Natur gan Asiantaeth yr Amgylchedd, Natural England a'r ymgynghorwyr 3Keel, a ddewisodd fenter y Bartneriaeth i sefydlu'r rhanbarth fel Prifddinas Prydain Wledig i helpu i lunio trafodaeth, gan adlewyrchu diddordeb cenedlaethol cynyddol yng ngwaith y Bartneriaeth ar draws y ffin rhwng Cymru a Lloegr.

Daeth y ford gron â swyddogion a phartneriaid y llywodraeth ynghyd i archwilio sut y gall cydweithio lleol, yn seiliedig ar leoedd, ddod â busnesau a chyrff cyhoeddus at ei gilydd i reoli tir, dŵr a seilwaith mewn ffordd sy'n cefnogi adferiad amgylcheddol a thwf economaidd.

Dywedodd Glyn Preston, Aelod Cabinet Cyngor Sir Powys dros Dwf Economaidd: "Ers amser maith, mae natur a thwf economaidd wedi cael eu trin fel pe bai'r naill yn dod ar draul y llall. Ond mae'r dull hwnnw'n ein dal ni yn ôl.

"Mae economi gref a gwydn yn dibynnu ar systemau naturiol iach. Trwy weithio gyda'n gilydd ar draws sectorau a chymryd golwg system gyfan tuag at dir, dŵr a seilwaith, gallwn gefnogi twf wrth gryfhau'r amgylchedd naturiol.

"Trwy'r Bartneriaeth, rydym yn helpu i ddangos y gall ardaloedd gwledig arwain y ffordd wrth ddarparu atebion ymarferol sydd o fudd i'r economi a natur."

Mae'r Bartneriaeth, dan arweiniad Cyngor Sir Powys a Chyngor Swydd Amwythig, eisoes yn datblygu dulliau newydd o dwf gwyrdd, gwytnwch dŵr a chynllunio seilwaith hirdymor.

Mae cyfranogiad yn y ford gron yn tynnu sylw at y gydnabyddiaeth genedlaethol gynyddol o'r gwaith hwn a'r rôl y gall ardaloedd gwledig ei chwarae wrth gyflawni twf economaidd cynaliadwy