Presenoldeb yn yr ysgol a lles

Cymorth a Chyngor ym Mhowys

Pwysigrwydd presenoldeb da yn yr ysgol i bob dysgwr

Mae presenoldeb rheolaidd yn yr ysgol yn cael effaith gadarnhaol ar blant a phobl ifanc a dylanwad mawr ar ddeilliannau plant a phobl ifanc. Mae presenoldeb rheolaidd yn cefnogi datblygiad sgiliau llythrennedd a rhifedd, ac ar y ddealltwriaeth sydd ei hangen i astudio ymhellach a bod yn llwyddiannus yn y gweithle. Mae cysylltiad cryf rhwng canlyniadau arholiadau a chyfraddau presenoldeb: gall gwersi a gollir olygu colli gwybodaeth, sgiliau a syniadau allweddol.

Mae presenoldeb da hefyd yn cael effaith gadarnhaol ar lesiant emosiynol a chorfforol. Po fwyaf o amser y bydd plentyn yn ei dreulio gyda phlant eraill yn yr ystafell ddosbarth ac fel rhan o'r gweithgareddau ysgol eraill, y mwyaf tebygol y byddant yn gwneud ffrindiau, yn teimlo eu bod wedi'u cynnwys, ac yn datblygu sgiliau cymdeithasol, hyder a hunan-barch.

Beth allaf ei wneud i sicrhau bod fy mhlentyn yn mynychu'r ysgol?

Rydym yn deall y gall godi'r plant, eu paratoi a mynd â nhw allan o'r tŷ bob bore fod yn anodd weithiau, yn enwedig os nad yw eich plentyn am fynd i'r ysgol. Fodd bynnag, dylech wneud pob ymdrech i gefnogi presenoldeb. Gallwch wneud hyn drwy'r canlynol:

• Bod yn ymwybodol o bolisi presenoldeb eich ysgol a chysylltiadau a enwir.
• Sicrhau arferion da yn ystod y tymor. Mae arferion cysgu da'n hanfodol i gefnogi presenoldeb da.
• Cynllunio a pharatoi ymlaen llaw ar gyfer y diwrnod / yr wythnos i ddod.
• Bod yn brydlon.
• Cymryd diddordeb yn addysg eich plentyn a chreu diwylliant dysgu cadarnhaol yn y cartref, lle mae addysg yn cael ei gwerthfawrogi.

Beth allaf ei wneud i gefnogi fy mhlentyn os ydynt yn anhapus yn yr ysgol?

Os ydych chi'n amau bod eich plentyn yn anhapus neu'n colli'r ysgol, mae ymyrraeth gynnar yn allweddol. Dylech roi cynnig ar y canlynol:

• Siarad â'ch plentyn i ganfod beth yw'r materion.
• Cynnig cymorth i fynd i'r afael â'r problemau hyn.
• Cysylltu â'r ysgol yn uniongyrchol a gofynnwch am gyngor a chymorth. Cytuno ar gynllun gweithredu gyda dyddiadau adolygu rheolaidd.
• Gwneud yn siŵr bod eich plentyn yn gwybod nad ydych yn derbyn eu bod yn colli'r ysgol am unrhyw reswm, ond byddwch yn effro i unrhyw faterion rydych wedi'u canfod a sylwi arnynt

Os yw eich plentyn yn colli'r ysgol - cysylltwch â'r ysgol yn uniongyrchol a gweithiwch gyda nhw i fynd i'r afael â'r materion yn gyflym.

Beth fydd yr ysgol yn ei wneud os bydd gan fy mhlentyn bresenoldeb gwael?

Bydd yr ysgol yn gweithio gyda chi'n uniongyrchol ac yn cynnal cyswllt rheolaidd gan gynnig cymorth, cyngor ac arweiniad parhaus.

Bydd yr ysgol yn cadw cofrestr presenoldeb briodol - gall absenoldeb gael ei awdurdodi neu gall fod heb awdurdod

Gall yr ysgol gynnig cymorth amlasiantaethol ychwanegol a/neu wneud atgyfeiriadau uniongyrchol i asiantaethau eraill a/neu'r Awdurdod Lleol i gael rhagor o gyngor, arweiniad a chymorth.

Gwasanaeth Lles Addysg

Mae tîm bach o Swyddogion Lles Addysg yn gwasanaethu pob ysgol ym Mhowys, sy'n darparu cyswllt rhwng yr ysgolion, gwasanaethau addysg, teuluoedd, plant a phobl ifanc. Prif dasg Swyddog Lles Addysg yw annog a gwella presenoldeb ysgol gyfan, cefnogi disgyblion unigol a'u teuluoedd i fynychu addysg addas, a chyflawni cyfrifoldebau cyfreithiol yr Awdurdod Lleol.

Gall y Gwasanaeth Lles Addysg gynnig cyngor, arweiniad, a chymorth, a gallant eich cyfeirio at wasanaethau eraill. Maen nhw'n gweithio'n agos â gwasanaethau iechyd, gyrfaoedd, cynhwysiant ieuenctid, yr heddlu a gwasanaethau cymdeithasol.

I gael rhagor o wybodaeth a chyngor, cysylltwch â'r tîm Gwasanaeth Lles Addysg.

Cysylltiadau Lles Ysgol