Nod Deddf Teithio Llesol (Cymru) 2013 yw gwneud Cymru yn genedl o gerddwyr a seiclwyr. Ei diben yw galluogi mwy o bobl i deithio'n llesol ar gyfer teithiau byr yn hytrach na defnyddio cerbydau modur, lle mae'n addas iddynt wneud hynny.
Gorolwg o'r Ddeddf
Mae'r Ddeddf yn gofyn i awdurdodau lleol yng Nghymru i lunio mapiau teithio llesol a chyflwyno gwelliannau flwyddyn ar flwyddyn ar lwybrau a chyfleusterau teithio llesol.
Mae'n gofyn i awdurdodau priffyrdd yng Nghymru i wneud gwelliannau i lwybrau a chyfleusterau ar gyfer cerddwyr a seiclwyr gan ystyried anghenion cerddwyr a seiclwyr mewn ystod o swyddogaethau eraill yr awdurdod priffyrdd.
Mae'n gofyn hefyd i Weinidogion Cymru ac awdurdodau lleol i hyrwyddo teithiau llesol wrth ymarfer eu swyddogaethau dan y Ddeddf hon.
Mae Ymgysylltu â Rhanddeiliaid Map Rhwydwaith Teithio Llesol Cyngor Sir Powys ar agor.
Mae'r Map Rhwydwaith Teithio Llesol Map Rhwydwaith Teithio Llesol (MRhTLl) yn dangos yr holl lwybrau teithio llesol sydd eisoes yn bodoli yn y sir, ynghyd â llwybrau posibl ar gyfer y dyfodol a nodwyd gan randdeiliaid a phreswylwyr yn ystod cyfnodau datblygu mapiau blaenorol (2016-2017 a 2020-2022).
Mae'r MRhTLl yn arwyddocaol gan ei fod nid yn unig yn nodi llwybrau teithio llesol ond hefyd yn cefnogi'r broses o gynllunio datblygiadau'r dyfodol o ran cynlluniau a rhwydweithiau teithio llesol. Yn ystod y diweddariad diwethaf y MRhTLl, cafodd dros 500 o lwybrau posibl ar gyfer y dyfodol eu nodi gan randdeiliaid a phreswylwyr ar draws yr 11 ardal ddynodedig (fel y'u diffiniwyd gan y Gweinidog). Mae'r diweddariad diweddaraf hwn yn gyfle i chi awgrymu newidiadau i'r llwybrau a nodwyd yn flaenorol ar gyfer y dyfodol, yn ogystal ag unrhyw lwybrau neu welliannau newydd.
Sylwch, nod y fenter hon yw amlinellu llwybrau a gwelliannau posibl o fewn yr ardaloedd dynodedig yn unig (sef aneddiadau a bennir gan y Gweinidog) ac nid yw'n sicrhau cyllid ar gyfer y llwybrau hynny.
