12 mis o oedi i greu ysgol gynradd newydd
7 Rhagfyr 2022
Yn gynharach eleni, cafodd cynnig i uno Ysgol Fabanod Mount Street, Ysgol Iau Mount Street ac Ysgol Gynradd Cradoc a chreu ysgol gynradd newydd sbon, ei gymeradwyo fel rhan o gynlluniau i Drawsnewid Addysg yn nalgylch Aberhonddu.
Y dyddiad targed ar gyfer sefydlu'r ysgol gynradd newydd a fyddai'n gweithredu o'r tri safle presennol, oedd Medi 2023.
Ond ers cymeradwyo'r cynnig, cyflwynwyd cais i'r llysoedd am adolygiad barnwrol o benderfyniad y cyngor i uno'r dair ysgol. Er i'r cais gael ei gyflwyno i'r llysoedd ym mis Ebrill, nid yw wedi cael ei drafod hyd yma.
Gan fod y broses gyfreithiol yn parhau, gofynnir i'r Cabinet ohirio gweithredu'r cynnig am 12 mis arall tan Medi 2024.
Dywedodd y Cynghorydd Pete Roberts, Aelod Cabinet ar gyfer Powys sy'n Dysgu: "Tan i'r broses gyfreithiol ddod i ben, ni fydd yn bosibl i'r cyngor fwrw 'mlaen gyda rhai o'r agweddau angenrheidiol sydd angen eu gwneud i roi'r cynnig ar waith.
"Mae hyn yn golygu na fydd digon o amser i wneud popeth sydd ei angen i allu agor yr ysgol newydd fis Medi nesaf.
"Oherwydd y broses gyfreithiol, rwy'n argymell i'r Cabinet ein bod yn gohirio'r cynnig am 12 mis arall tan fis Medi 2024. Bydd hyn yn golygu y gallwn wneud y trefniadau angenrheidiol i roi'r penderfyniad ar waith pan fydd y broses gyfreithiol ar ben.
"Os bydd y Cabinet yn cymeradwyo'r argymhelliad, bydd Ysgol Fabanod Mount Street, Ysgol Iau Mount Street ac Ysgol Gynradd Cradoc yn parhau i weithredu fel ysgolion ar wahân am 12 mis arall, gan agor yr ysgol newydd ar y tri safle ym mis Medi 2024.
"Rwy'n sylweddoli y bydd hyn yn achosi ansicrwydd ychwanegol i gymunedau'r dair ysgol ond rwy'n gobeithio eu bod yn deall bod yr angen i ohirio'r broses tu hwnt i reolaeth y cyngor."
Bydd y Cabinet yn ystyried yr argymhelliad ddydd Mawrth 13 Rhagfyr.
Rhannu'r dudalen hon
Argraffu
