Arolwg Llyfrgell Machynlleth
2 Chwefror 2023
Mae Cyngor Sir Powys wedi bod yn gweithio ar gynlluniau i godi ysgol newydd ar gyfer Ysgol Bro Hyddgen ers 2017 ar safle'r ysgol uwchradd i gymryd lle'r adeiladau ysgolion cynradd ac uwchradd presennol.
Mae'r cyngor eisiau adeiladu'r ysgol newydd a fydd â lle i 540 o ddisgyblion, gyda chyfleusterau blynyddoedd cynnar, ardaloedd ar gyfer addysg gynradd, uwchradd ac ôl-16, ystafell gymunedol, canolfan anghenion dysgu ychwanegol, ardaloedd llesiant yn ogystal ag ardaloedd allanol a chae 3G.
Gallai'r dyluniad gynnwys lle i lyfrgell gyhoeddus pe bai angen.
Nawr mae'r cyngor eisiau barn trigolion sy'n byw ym Machynlleth a Bro Ddyfi ynghylch a ddylai llyfrgell y dref adleoli i adeilad newydd yr ysgol cyn i'r dyluniadau gael eu cwblhau.
Dywedodd y Cynghorydd Selby, Aelod Cabinet am Bowys Ffyniannus: "Yr adeilad newydd ar gyfer Ysgol Bro Hyddgen fydd yr adeilad ysgol Passivhaus cyfan gwbl cyntaf gan y cyngor a bydd yn darparu cyfleusterau rhagorol ar gyfer y genhedlaeth nesaf o ddysgwyr.
"Bydd yr adeilad newydd hefyd yn rhoi cyfle i'r cyngor ddarparu lle ar gyfer llyfrgell gyhoeddus os oes angen.
"Fodd bynnag, hoffem glywed gan drigolion ym Machynlleth a Bro Ddyfi am y syniad o symud y llyfrgell i adeilad newydd yr ysgol."
I gymryd rhan yn yr arolwg ewch i www.dweudeichdweudpowys.cymru/ysgol-bro-hyddgen-datblygu-ysgol-newydd
Bydd yr arolwg yn cau ddydd Mawrth 28 Chwefror.