Cyngor Sir Powys yn cyhoeddi alldro ariannol ar gyfer 2023/24
![Image of new British money](/image/17329/Image-of-new-British-money/standard.png?m=1677169076060)
19 Gorffennaf 2024
![Image of new British money](/image/17329/Image-of-new-British-money/gi-responsive__100.png?m=1677169076060)
Roedd gan y cyngor danwariant o £1.8m ar gyfer y flwyddyn ariannol 2023/24 a ddaeth i ben ar 31 Mawrth, ar ôl cyfraniadau i gronfeydd wrth gefn penodol, o £0.5 miliwn yn erbyn y gyllideb o £242.1 miliwn - amrywiant o 0.7% - ac eithrio Ysgolion a'r Cyfrif Refeniw Tai.
Dywedodd y Cynghorydd David Thomas, Aelod Cabinet ar gyfer Cyllid a Thrawsnewid; "Eleni gwelwyd y Cyngor yn llwyddo i reoli ei gyllideb mewn amgylchedd economaidd hynod heriol. Mae chwyddiant uchel a dyfarniadau cyflog wedi parhau i effeithio ar gostau ar draws pob gwasanaeth, er bod hyn wedi'i reoli'n dda ar y cyfan trwy gamau lliniaru a defnyddio'r gyllideb risg. Mae sefyllfa ariannol y Cyngor wedi cael ei fonitro'n agos drwy gydol y flwyddyn gydag adroddiadau chwarterol yn cael eu cyflwyno i'r Cabinet.
"Fe wnaethon ni gyflawni arbedion o £15.4m mewn blwyddyn ac mae hwn yn arbediad parhaol ac yn gylchol o flwyddyn i flwyddyn. Mae incwm ychwanegol, defnydd effeithiol o gyllid grant allanol a ffocws parhaus ar leihau ein gwariant wedi creu cyfleoedd i ryddhau cyllid un-tro i gefnogi'r pwysau cynyddol sydd eisoes yn wynebu cyllideb refeniw 2024/25 a'r blynyddoedd i ddod.
"Rydym wedi gallu neilltuo arian i gefnogi ein blaenraglen gyfalaf, buddsoddi mewn ysgolion, gwasanaethau cymdeithasol a gweithgareddau newid hinsawdd, yn ogystal â chefnogi prosiectau a fydd yn trawsnewid y ffordd rydym yn gweithio, gan baratoi'r Cyngor ar gyfer yr heriau ariannol sydd o'n blaenau.
"Mae'r cyfleoedd hyn yn mynd rhywfaint o'r ffordd i ddad-beryglu sefyllfa ariannol y cyngor yn y tymor byr. Ni fydd yr arian yr ydym yn disgwyl ei gael gan Lywodraeth Cymru yn y blynyddoedd i ddod yn ein galluogi i barhau i gefnogi ein preswylwyr yn yr un ffordd ag yr ydym yn ei wneud ar hyn o bryd. Bydd angen i'r Cyngor wneud newidiadau sylweddol i leihau costau ac i fynd i'r afael â'r bwlch sylweddol yn ein cynlluniau cyllidebol. Er bod ein sefyllfa eleni yn ein galluogi i reoli pwysau parhaus yn ystod y flwyddyn ariannol nesaf, rhagwelir mai'r diffyg cyllidebol dros y 4 blynedd nesaf fydd oddeutu £41 miliwn.
"Mae'n rhaid i ni symud ymlaen yn gyflym i ddatblygu ein cynlluniau i sicrhau Powys Gynaliadwy ar gyfer y dyfodol. Mae hyn yn hanfodol er mwyn sicrhau bod y Cyngor yn gallu parhau i fod yn sefydlog yn ariannol a darparu gwasanaethau cynaliadwy yn y tymor hir," ychwanegodd.
Mae'r ffeithlun isod yn esbonio rhaniad gwariant y cyngor ar gyfer 2023-24 a ddangosir fel cyfran o £100 o dreth y cyngor. Gwariwyd y rhan fwyaf o gyllideb y cyngor y llynedd gan Ysgolion a Gofal Cymdeithasol, sy'n cyfateb i 68% o'r gyllideb gyffredinol. Gwariwyd 11% ar ffyrdd, trafnidiaeth ac ailgylchu.
Rydym yn darparu addysg i 15,523 o ddysgwyr oedran ysgol statudol drwy 72 o ysgolion cynradd, 8 ysgol uwchradd, 3 ysgol pob oed a 3 ysgol arbennig.
Darperir gofal cymdeithasol oedolion ar gyfer 1,750 o bobl - oedolion hŷn a'r rhai sydd â phroblemau iechyd meddwl, anableddau corfforol a dysgu o fewn cyfleusterau gofal hirdymor. Rydym hefyd yn darparu gofal yn y gymuned i 2,771 o bobl i'w galluogi i fyw'n dda yn eu cartrefi am gyfnod hirach a darparu cymorth ac atal cynnar i 2,570 o bobl eraill i ohirio eu hangen am gymorth dwysach.
Mae gan Wasanaethau plant 876 o achosion plant ar agor gyda 401 arall yn agored i gymorth cynnar. Mae gan 670 o blant gynllun cymorth gofal ac mae'r Cyngor yn gyfrifol am 247 o Blant sy'n Derbyn Gofal.
Gwaith cynnal a chadw ffyrdd o dros 5,800 cilometr (rhai gydag arwynebedd caled a rhai heb) a 14,500 o bolion goleuadau stryd ynghyd â 9,250 cilomedr o hawliau tramwy cyhoeddus ac 1.1 miliwn o gasgliadau gwastraff gweddilliol a 3.5 miliwn o gasgliadau ailgylchu o dros 55,000 tunnell ar draws yr holl ffrydiau casglu, a darpar-gyfradd ailgylchu i Bowys o 68.5% ar gyfer 2023-24.
![Mae'r ffeithlun isod yn esbonio rhaniad gwariant y cyngor ar gyfer 2023-24 a ddangosir fel cyfran o £100 o dreth y cyngor.](/image/21584/Maer-ffeithlun-isod-yn-esbonio-rhaniad-gwariant-y-cyngor-ar-gyfer-2023-24-a-ddangosir-fel-cyfran-o-100-o-dreth-y-cyngor./gi-responsive__100.jpg?m=1721389070527)