Strategaeth a Ffefrir y Cynllun Datblygu Lleol (CDL) Newydd

Mae Awdurdod Cynllunio Lleol Powys yn cynnal ymgynghoriad saith wythnos ar y Strategaeth a Ffefrir ar gyfer y Cynllun Datblygu Lleol Newydd. Mae cyfnod yr ymgynghoriad yn rhedeg o ddydd Llun 19 Awst tan ddydd Llun 7 Hydref 2024.

Beth yw'r Strategaeth a Ffefrir?

Fel rhan o'r cam paratoi Cyn-adneuo (neu'r Strategaeth a Ffefrir), mae'r Cyngor wedi bod wrthi'n adolygu'r sylfaen dystiolaeth, ymgysylltu â rhanddeiliaid ar y Materion, Amcanion a Gweledigaeth, ac yn ystyried opsiynau strategol ar gyfer y CDL Newydd. Ar ben y gwaith yma, mae'r Strategaeth a Ffefrir wedi cael ei baratoi bellach ar gyfer ymgynghoriad cyhoeddus. Ymhlith dogfennau eraill a gyhoeddwyd mae'r Gwerthusiad Cynaliadwyedd Integredig Cychwynnol a'r Adroddiad Gwybodaeth Asesiad Rheoliadau Cynefinoedd.

Diben Strategaeth a Ffefrir CDL Newydd Powys yw mynd i'r afael ag anghenion Cynllun Ardal Powys drwy gynnig lefelau ar gyfer twf tai a chyflogaeth, ac adnabod yn fras lle y dylid dosbarthu'r rhain. Mae'r Strategaeth a Ffefrir yn cynnwys Hierarchaeth Aneddiadau Cynaliadwy arfaethedig ynghyd â chyfres o bolisïau cynllunio lefel strategol fydd yn cael eu hehangu drwy bolisïau manwl a dyraniadau tir arfaethedig (ar gyfer datblygiadau newydd) yn ystod camau dilynol proses y CDL Newydd.

Cynhelir ymgynghoriad saith wythnos ar y Strategaeth a Ffefrir rhwng 19 Awst a 7 Hydref 2024. Mae hyn yn cynnwys cyfle i gynnig sylwadau ar y Safleoedd Ymgeisiol a gynigiwyd i'w hystyried yn ystod Cam yr Alwad ar gyfer Safleoedd yn 2022, a gyhoeddwyd bellach yn y Gofrestr o Safleoedd Ymgeisiol. Mae modd hefyd cyflwyno safleoedd ymgeisiol newydd i'w hystyried.

Yr Ymgynghoriad

Yn unol â gofynion statudol, mae'r Awdurdod Cynllunio Lleol yn lansio ymgynghoriad ar Gynllun Datblygu Lleol Newydd Cyn-adneuo (Strategaeth a Ffefrir) Powys 2022-2037.

Ceir manylion llawn y cam hwn o baratoi'r cynllun yma: Datganiad o faterion Cyn-adneuo (PDF) [167KB]

Gellir gweld yr holl ddogfennau, gan gynnwys papurau tystiolaeth, yma Powys County Council / Cyngor Sir Powys - Ymgynghoriadau.

Yn ogystal, gallwch archwilio'r prif ddogfennau ymgynghori drwy ymweld â'r lleoliadau canlynol o 19 Awst 2024:

Swyddfeydd y Cyngor, Neuadd y Sir, Llandrindod, Powys. LD1 5LG. 9 am - 5 pm (Llun - Iau), 9 am - 4.30 pm (Gwener)
Y llyfrgelloedd canlynol yn ystod oriau agor arferol (Taro heibio / Wyneb yn Wyneb - Cyngor Sir Powys): Aberhonddu, Llanfair ym Muallt, Llandrindod, Llanfyllin, Llanidloes, Llanwrtyd, Machynlleth, Y Drenewydd, Llanandras, Rhaeadr Gwy, Y Trallwng ac Ystradgynlais.

Mae'r cyfnod ymgynghori yn rhedeg o Ddydd Llun 19 Awst tan ddydd Llun 7 Hydref 2024.

Mae'r ymgynghoriad yn cau am 5pm ddydd Llun 7 Hydref 2024.

Mae'r Cyngor yn annog cyfranogwyr i gyflwyno sylwadau trwy borth ymgynghori'r CDL Powys County Council / Cyngor Sir Powys - Ymgynghoriadau. Fel arall, gellir casglu ffurflenni cyflwyno (sylwadau) o'r lleoliadau ymgynghori neu drwy ofyn am ffurflen drwy ebostio ldp@powys.gov.uk.

Hefyd, gallwch weld Adroddiad Adolygu'r CDL a Fabwysiadwyd (2011-2026) a ysgogodd proses y cynllun newydd ynghyd â Chytundeb Cyflawni'r CDL Newydd (2022-2037) yma: Cynllun Datblygu Lleol Newydd - Cynllun Adolygu a Chytundeb Cyflawni - Cyngor Sir Powys

Beth sy'n digwydd nesaf?

Ar ôl i gyfnod yr ymgynghoriad gau, bydd y Cyngor yn dadansoddi ac yn ystyried y sylwadau a dderbyniwyd ar y Strategaeth a Ffefrir. Lle ystyrir ei fod yn briodol, defnyddir y sylwadau i fireinio Strategaeth y CDL ar i lunio'r Cynllun Adneuo.

Bydd y Cynllun Adneuo'n cynnwys Strategaeth a pholisïau cynllunio mwy manwl at ddibenion rheoli datblygu, polisïau safle a dyraniadau, a fframwaith monitro. Caiff ei gyhoeddi am gyfnod statudol o o leiaf chwe wythnos ar gyfer ymgynghoriad cyhoeddus. Ceir rhagor o wybodaeth o ran yr amserlen a'r camau mewn perthynas â pharatoi'r CDL Newydd yn y Cytundeb Cyflawni cymeradwy, sydd ar gael yma Cynllun Datblygu Lleol Newydd - Cynllun Adolygu a Chytundeb Cyflawni - Cyngor Sir Powys