Mae hi bellach yn orfodol i gofrestru eich adar
14 Hydref 2024
Yn flaenorol, dim ond os oeddech chi'n cadw 50 neu fwy o adar oedd gofyniad cyfreithiol i chi gofrestru.
Fodd bynnag, ers 1 Hydref 2024, mae'r gofyniad cyfreithiol newydd yn golygu bod yn rhaid i bawb sy'n cadw dofednod ac adar caeth eraill gofrestru beth bynnag fo'r nifer sydd ganddynt.
Bellach, mae Tîm Iechyd Anifeiliaid Cyngor Sir Powys yn annog ceidwaid adar nad ydynt wedi cofrestru eu hunain gyda'r Asiantaeth Iechyd Anifeiliaid a Phlanhigion (APHA) i wneud hynny ar unwaith.
Drwy gofrestru byddwch yn derbyn diweddariadau a chanllawiau os oes achosion o glefydau, fel ffliw adar, yn eich ardal chi.
Byddwch hefyd yn helpu i atal clefydau rhag lledaenu ac i ddiogelu pob aderyn a gedwir, gan gynnwys heidiau iard gefn.
Dywedodd y Cynghorydd Richard Church, Aelod Cabinet ar gyfer Powys fwy Diogel: "Bydd y gofynion cofrestru newydd yn helpu ceidwaid adar i ddiogelu eu heidiau o adar. Bydd modd i'r Asiantaeth Iechyd Anifeiliaid a Phlanhigion (APHA) gysylltu â cheidwaid adar os oes achosion o glefyd hysbysadwy yn eu hardal, fel ffliw adar, i'w hysbysu am y camau y mae angen iddynt eu cymryd i ddiogelu iechyd eu hadar, ac i atal y clefyd rhag lledaenu.
"Mae'n bwysig cofio bod sylw manwl at hylendid a bioddiogelwch yn parhau i fod yn hanfodol i ddiogelu heidiau rhag bygythiad o glefyd.
"Mae ceidwaid adar wedi gweithio'n galed i ddiogelu eu heidiau o adar rhag risgiau ffliw adar dros y blynyddoedd diwethaf ac rwyf am ddiolch iddynt am eu hymdrechion parhaus."
Bydd gofyn i geidwaid adolygu eu cofnod ar y gofrestr yn flynyddol er mwyn sicrhau bod eu manylion yn gyfredol a bod unrhyw newidiadau'n cael eu cofnodi.
Mae rhai mathau o adar caeth sy'n cael eu cadw fel anifeiliaid anwes ac sy'n byw dan do yn unig heb fynd allan o gwbl, wedi'u heithrio rhag cofrestru.
I gael gwybod mwy, ewch i www.gov.uk/poultry-registration
Rhannu'r dudalen hon
Argraffu
