Galw pob contractwr adeiladu: Helpwch ni i adeiladu'r genhedlaeth nesaf o gartrefi cyngor

14 Chwefror 2025

Mae Cyngor Sir Powys yn gwahodd contractwyr adeiladu sydd â phrofiad o arwain cynlluniau adeiladu tai i ddod i gael gwybod mwy am ei raglen datblygu tai cyffrous mewn digwyddiad yn y Trallwng fis nesaf.

Bydd digwyddiad Cwrdd â'r Prynwr yn cael ei gynnal yng Nghanolfan Integredig i Deuluoedd y Trallwng ddydd Iau, 13 Mawrth, rhwng 10am a 4pm.

Bydd Tîm Datblygu Tai'r cyngor yn cyflwyno ei raglen datblygu tai ar gyfer gogledd Powys. Gwahoddir yr holl gontractwyr adeiladu sydd â phrofiad o weithredu fel prif gontractwyr mewn cynlluniau tai adeiladu i ddod i gael gwybod mwy.

Dywedodd y Cynghorydd Matthew Dorrance, Dirprwy Arweinydd ac Aelod Cabinet ar gyfer Powys Decach: "Rydym yn galw ar gontractwyr adeiladu i'n helpu i adeiladu'r genhedlaeth nesaf o gartrefi cyngor.

"Mae hwn yn gyfle gwych i gontractwyr adeiladu ymgysylltu'n uniongyrchol â ni wrth i ni weithio i fynd i'r afael â'r argyfwng tai ym Mhowys.

"Rydym wedi ymrwymo i adeiladu cartrefi cyngor o ansawdd uchel ledled y sir. Bydd y digwyddiad hwn yn darparu cyfleoedd i ddysgu am ein cynlluniau i adeiladu dyfodol cryfach, tecach a gwyrddach i Bowys."

Mae'r prosiectau datblygu tai a fydd yn cael eu cyflwyno yn y digwyddiad yn cynnwys:

• Datblygiad 38 uned sy'n cynnwys tai, fflatiau cerdded i fyny a byngalos yn yr Ystog
• Datblygiad 24 uned sy'n cynnwys tai, fflatiau cerdded i fyny a byngalos yn Llandrinio
• Datblygiad 18 uned sy'n cynnwys tai, fflatiau cerdded i fyny a byngalos yn Llanrhaeadr Ym Mochnant
• Datblygiad 16 uned sy'n cynnwys tai, fflatiau cerdded i fyny a byngalos yn Llanfyllin
• 16 o fyngalos yn y Trallwng

Bydd contractwyr yn gallu siarad yn uniongyrchol â staff y Tîm Datblygu Tai a'r Tîm Gwasanaethau Masnachol i gael dealltwriaeth o gynlluniau'r dyfodol a chynlluniau caffael.

Bydd y cynlluniau'n destun ymarferion tendro ar wahân ac nid yw'r cyngor yn ceisio cael un contractwr ar gyfer pob cynllun.

I gael gwybod mwy neu i gadw lle yn y digwyddiad, e-bostiwch affordable.housing@powys.gov.uk yn cadarnhau eich dewis ar gyfer amser bore neu brynhawn.

Y dyddiad cau ar gyfer cofrestru yw dydd Iau, 6 Mawrth.

I gael gwybod mwy am ymrwymiad y cyngor i ddatblygu 350 o gartrefi newydd i'w rhentu'n gymdeithasol, ewch i Datblygu Tai