Bwrdd newydd i helpu i yrru arloesedd Partneriaeth y Gororau Ymlaen
11 Ebrill 2025
Mae Partneriaeth y Gororau Ymlaen yn dwyn ynghyd Cyngor Swydd Henffordd, Cyngor Sir Fynwy, Cyngor Sir Powys a Chyngor Swydd Amwythig i ail-lunio tirwedd economaidd rhanbarth y Gororau drwy feithrin cydweithredu ac arloesi.
Bydd y Bwrdd newydd yn cynnwys Arweinwyr a Phrif Weithredwyr o'r pedwar awdurdod lleol, ynghyd â phartneriaid strategol allweddol, i yrru ymrwymiad ar y cyd ar gyfer economi wledig a threfol gyda chynhyrchiant uchel, rhanbarth sy'n arloesi yn y maes economi werdd, a chreu lleoedd iach a chysylltiedig.
Ar ôl ei sefydlu, bydd y Bwrdd yn cyfarfod bob chwarter, gan adlewyrchu natur ystwyth, strategol a gwirfoddol y bartneriaeth. Bydd yn canolbwyntio ar ddynodi a mynd i'r afael â materion cymhleth a thrawsbynciol yn fwy effeithiol, gan sicrhau y gall ymdrechion ar y cyd y rhanbarth gyflawni mwy yn wyneb heriau fel ansicrwydd ariannu, costau cynyddol, a gofynion cynyddol.
Ni fydd Bwrdd Partneriaeth y Gororau yn gwneud penderfyniadau ar ran unrhyw sefydliad partner ond bydd yn llywio cyfeiriad Grwpiau Rheoli Rhaglenni'r bartneriaeth i yrru ymyriadau y cytunwyd arnynt.
Dywedodd James Gibson-Watt, arweinydd Cyngor Sir Powys, wrth siarad ar ran y pedwar awdurdod lleol sy'n rhan o Bartneriaeth y Gororau Ymlaen: "Mae cymaint y gallwn ei wneud trwy weithio gyda'n gilydd. Er bod gennym ein swyddi dydd unigryw wrth redeg ein cynghorau, mae gennym hefyd nifer o heriau a rennir y gallwn fynd i'r afael â nhw gyda'n gilydd.
"Bydd y Bwrdd yn dod â rhanddeiliaid allweddol i mewn a fydd yn gallu rhannu eu harbenigedd sector unigol a chynnig mewnbwn adeiladol a gwybodus i'n cynigion.
"Un o'n heriau cyntaf yw blaenoriaethu'r hyn rydyn ni am ei wneud a sefydlu rhai themâu a'r manylion hynny sy'n ffurfio Cynnig y Gororau. Mae'n rhaid i ni ganolbwyntio'n llym ar wneud y gwahaniaeth fwyaf lle mae ei angen fwyaf. Bydd partneriaethau ehangach yn rhan annatod o'n llwyddiant."
Cyngor Swydd Amwythig fydd yn croesawu cyfarfod cyntaf y Bwrdd ar ddechrau'r haf yn Neuadd y Dref yr Amwythig.
Rhannu'r dudalen hon
Argraffu
