Chwilio am farn pobl ar gynlluniau uchelgeisiol i drawsnewid addysg ar gyfer canolbarth Powys
15 Mai 2025
Fel rhan o'i raglen Trawsnewid Addysg, mae Cyngor Sir Powys wedi bod yn ystyried opsiynau ar sut i symud ymlaen â'i gynlluniau i sefydlu ysgol newydd cyfrwng Cymraeg i bob oed yn Llanfair-ym-Muallt, ac i wneud newidiadau i Ysgol Calon Cymru ac Ysgol Gynradd Llanfair-ym-Muallt.
Byddai'r cynigion cyffrous yn helpu'r cyngor i gyflawni ei ddyheadau a amlinellwyd yn ei Gynllun Strategol Cymraeg mewn Addysg (WESP) ar gyfer 2022-32 yn ogystal â chyd-fynd â'i Strategaeth ar gyfer Trawsnewid Addysg ym Mhowys.
Nawr mae'r cyngor yn gofyn am farn y cyhoedd ar y cynigion, sydd â hyd nes ddydd Mercher, Gorffennaf 2 i gyflwyno eu barn.
Dyma'r cynigion, a fyddai'n cael eu cyflwyno mewn dau gam:
Cam 1 (Medi 2027):
- Sefydlu ysgol cyfrwng Cymraeg newydd i bob oed (4-18) ar gampws presennol Ysgol Calon Cymru yn Llanfair-ym-Muallt.
o I ddechrau byddai'r ysgol yn rhannu campws Llanfair-ym-Muallt gydag Ysgol Calon Cymru, gan ddefnyddio rhan o'i hadeilad a rhannu rhai cyfleusterau.
o Byddai hwn yn drefniant dros dro nes bod buddsoddiad cyfalaf ar safle Llandrindod.
- Newid categori iaith Ysgol Gynradd Llanfair-ym-Muallt i gyfrwng Saesneg.
o Byddai disgyblion yn y ffrwd cyfrwng Cymraeg yn Ysgol Gynradd Llanfair-ym-Muallt yn symud i'r ysgol newydd cyfrwng Cymraeg i bob oed.
- Newid categori iaith Ysgol Calon Cymru o ddwy ffrwd i gyfrwng Saesneg.
o Byddai disgyblion ym mlynyddoedd 7, 8 a 9 yn ffrwd cyfrwng Cymraeg Ysgol Calon Cymru ym mis Medi 2027 yn trosglwyddo i'r ysgol cyfrwng Cymraeg newydd i bob oed. Byddai ffrwd cyfrwng Cymraeg Ysgol Calon Cymru yn cael ei dileu'n raddol erbyn mis Medi 2029.
Cam 2 (Medi 2029 fan bellaf):
- Yn dilyn buddsoddiad cyfalaf ar gampws Llandrindod i ddarparu lle i holl ddisgyblion Ysgol Calon Cymru a gwella cyfleusterau presennol, byddai Ysgol Calon Cymru yn cau ei champws yn Llanfair-ym-Muallt ac yn gweithredu o gampws Llandrindod yn unig.
o Byddai disgyblion o gampws yr ysgol yn Llanfair-ym-Muallt yn symud i safle Llandrindod.
o Byddai'r ysgol cyfrwng Cymraeg i bob oed yn cymryd drosodd gampws cyfan Llanfair-ym-Muallt.
Dywedodd y Cynghorydd Pete Roberts, Aelod Cabinet dros Bowys sy'n Dysgu: "Mae'r cynnig cyffrous hwn yn cynrychioli'r cam nesaf yn y broses o gyflawni ein cynlluniau strategol ar gyfer addysg ym Mhowys. Byddant yn ein symud un cam yn nes at gyflawni ein Strategaeth ar gyfer Trawsnewid Addysg ym Mhowys a'n Cynllun Strategol Cymraeg mewn Addysg.
"Byddai'r cynigion yn gweld ysgol cyfrwng Cymraeg newydd i bob oed yn cael ei sefydlu yng nghanol Powys a fyddai'n darparu profiad cyfrwng Cymraeg gwell i'n dysgwyr tra gellid darparu cwricwlwm ehangach i ddysgwyr cyfrwng Saesneg a fyddai i gyd ar un campws, gan ddileu'r angen i ddyblygu darpariaeth cyfrwng Saesneg ar draws dau safle.
"Fel rhan o'n cynigion, byddem yn buddsoddi yn y ddau gampws i sicrhau bod pob dysgwr yn cael ei addysgu mewn cyfleusterau'r 21ain Ganrif a fydd yn eu galluogi i ffynnu a chyrraedd eu potensial llawn..
"Fodd bynnag, mae'n bwysig bod y bobl sy'n byw yn nalgylch Calon Cymru a'r ardal ehangach yn cael dweud eu dweud ar y cynigion hyn a byddwn yn eu hannog i anfon eu barn fel y gellir eu hystyried."
I ymateb i'r ymgynghoriad, ewch i Ysgol Calon Cymru a dilynwch y dolenni i roi eich barn ar-lein.
Fel arall, gallwch ymateb i ni yn ysgrifenedig drwy anfon e-bost at school.ymgynghoriad@powys.gov.uk neu drwy'r post i'r Tîm Trawsnewid Addysg, Cyngor Sir Powys, Neuadd y Sir, Llandrindod, LD1 5LG.
I ddarllen Strategaeth y cyngor ar gyfer Trawsnewid Addysg 2020-2032 a manylion y Rhaglen Trawsnewid Addysg - Cam 2 (2022 - 2027) ewch i Trawsnewid Addysg
Rhannu'r dudalen hon
Argraffu
