Cyngor yn croesawu treialon diogelwch beiciau modur PRIMES i fynd i'r afael ag argyfwng diogelwch ffyrdd

5 Mehefin 2025

Mae'r cynlluniau gan Lywodraeth Cymru i dreialu marciau ffordd newydd ar brif ffordd ym Mhowys i leihau damweiniau sy'n cynnwys beicwyr modur wedi cael eu croesawu gan y cyngor sir.

Mae'r marciau, o'r enw Gwybodaeth Ganfyddiadol am Feicwyr ar gyfer Gwneud y Mwyaf o Arbenigedd a Mwynhad (PRIMEs), wedi'u cynllunio i helpu beicwyr i wneud penderfyniadau gwell wrth agosáu at droadau.

Mae Cyngor Sir Powys wedi croesawu penderfyniad Llywodraeth Cymru i dreialu'r marciau ffordd mewn dau safle yn dilyn cais ffurfiol gan y cyngor yn gynharach eleni. Bydd y treialon yn digwydd ar yr A483 yn y lleoliadau isod:

• Neuadd Glascoed, i'r de o'r Drenewydd
• Fferm Crochan Isaf, i'r gogledd o Llanbadarn Fynydd

Daw'r cyhoeddiad mewn ymateb i benderfyniad y cyngor ym mis Mawrth, a alwodd ar Lywodraeth Cymru i gefnogi ac ariannu menter PRIMES fel rhan o strategaeth ehangach i fynd i'r afael â'r hyn a ddisgrifiwyd fel "argyfwng diogelwch ffyrdd" yn y sir.

Dywedodd y Cynghorydd Richard Church, Aelod Cabinet dros Wasanaethau Cyfreithiol a Rheoleiddio: "Mae hwn yn gam hanfodol ymlaen wrth fynd i'r afael â'r nifer annerbyniol o ddamweiniau difrifol ar ein ffyrdd. Mae menter PRIMES yn ddull arloesol yr ydym yn gobeithio y bydd yn gwneud gwahaniaeth gwirioneddol wrth amddiffyn beicwyr modur a phob un sy'n defnyddio'r ffordd ym Mhowys."

Ychwanegodd y Cynghorydd Jackie Charlton, Aelod Cabinet dros Bowys Werddach: "Rydym wedi gweld gormod o fywydau'n cael eu colli neu eu newid am byth oherwydd gwrthdrawiadau traffig ffyrdd ac mae cyfran fawr o'r rhain yn cynnwys beicwyr modur. Mae'r treialon hyn yn rhan o'n hymrwymiad i deithio mwy diogel a chynaliadwy ym Mhowys. Rydym yn falch bod Llywodraeth Cymru wedi gwrando ar ein pryderon ac wedi gweithredu arnynt."

Mae treial PRIMES yn un o sawl argymhelliad a wnaed gan Grŵp Diogelwch Ffyrdd Strategol Powys mewn adroddiad a anfonwyd at y Gweinidog yn 2024, sy'n cynnwys cynrychiolwyr o Gyngor Sir Powys, Heddlu Dyfed Powys, Llywodraeth Cymru, a'r Comisiynydd Heddlu a Throseddu. Sefydlwyd y grŵp i nodi camau gweithredu brys i leihau marwolaethau ac anafiadau difrifol ar ffyrdd Powys.

Mae PRIMES wedi cael ei gyflwyno'n llwyddiannus ar ffyrdd ucheldiroedd yr Alban. Mae rhagor o wybodaeth am PRIMES ar gael yma: New road markings transform behaviour of motorcyclists on bends | Transport Scotland

Dros y degawd diwethaf, mae mwy na 100 o bobl wedi marw ar ffyrdd Powys, gyda llawer mwy yn dioddef anafiadau a newidiodd eu bywydau. Mae'r cyngor yn parhau i weithio gyda phartneriaid i hyrwyddo addysg, gorfodi a gwelliannau seilwaith i wneud ffyrdd yn fwy diogel i bawb.