Lleisiau ifanc yn arwain y ffordd yng Nghynhadledd Tasglu Tlodi Plant

20 Mehefin 2025

Gwnaeth disgyblion Ysgol Golwg y Cwm argraff fawr yng nhrydydd Cynhadledd Flynyddol Tasglu Tlodi Plant Cyngor Sir Powys yr wythnos diwethaf, gan herio'r cyngor a'i bartneriaid i wneud mwy i fynd i'r afael â thlodi plant ar draws y sir.

Mewn sesiwn dan arweiniad Grŵp Gweithredu Tlodi Plant, rhannodd y plant eu profiadau a'u safbwyntiau o dlodi, gan gynnig mewnwelediadau pwerus sy'n gosod y naws ar gyfer diwrnod o adlewyrchu, dysgu a gweithredu.

Tanlinellodd eu lleisiau frys y gwaith sydd o'n blaen a chawsant ymrwymiad cryf gan arweinwyr y cyngor i wrando, ymateb a sicrhau newid ystyrlon.

Cynhaliwyd y gynhadledd yn y Neuadd Les hanesyddol yn Ystradgynlais ddydd Iau 12 Mehefin, a daeth gweithwyr proffesiynol, arweinwyr cymunedol a phartneriaid o'r sector cyhoeddus at ei gilydd i adolygu cynnydd a chynllunio camau gweithredu ar gyfer y dyfodol. Roedd sefydliadau cenedlaethol allweddol, gan gynnwys NSPCC Cymru a Chanolfan Polisi Cyhoeddus Cymru, hefyd yn bresennol yn y gynhadledd.

Dathlodd y gynhadledd gyflawniadau'r flwyddyn ddiwethaf, gan gynnwys cyflawni prosiectau dan arweiniad y gymuned a ariannwyd gyda £90,000 gan Lywodraeth Cymru. Roedd y rhain yn cynnwys sesiynau coginio i'r teulu yn Ysgol Golwg y Cwm, digwyddiadau llythrennedd yn Llandrindod, a gweithgareddau ymgysylltu â phobl ifanc ledled y sir.

Hysbysodd y cyngor y cynrychiolwyr hefyd ei fod wedi sicrhau £125,000 arall gan Gynllun Grant Arloesi a Chefnogi Cymunedau Tlodi Plant Llywodraeth Cymru. Bydd yr arian hwn yn cefnogi:

• Swyddog Ymgysylltu Pobl Ifanc i sicrhau bod lleisiau plant a phobl ifanc yn llywio cefnogaeth yn y dyfodol.
• Comisiwn Gwirionedd Tlodi newydd, o'r enw "Dweud Gwirioneddau Wrth Bowys", i ddod â phrofiad o lygad y ffynnon wrth lunio polisïau.
• Cynllun Cymorth Hanfodol i ddarparu cymorth ar frys gyda bwyd, dillad ac angenrheidiau eraill.

Meddai'r Cynghorydd Matthew Dorrance, Dirprwy Arweinydd ac Aelod Cabinet ar gyfer Powys Decach: "Roedd ein trydedd Gynhadledd Tasglu Tlodi Plant yn hynod o addysgiadol ac ysbrydoledig.

"Clywsom yn uniongyrchol gan bobl ifanc am eu profiadau o dlodi ym Mhowys, ac maen nhw wedi ein herio i wneud mwy. Rwy'n mynd â'r her honno'n ôl i Neuadd y Sir, a byddaf yn gweithio gyda chynghorwyr a staff i sicrhau ein bod yn cyflawni newid go iawn.

"Gyda'n partneriaid, cymunedau, a chyllid newydd gan Lywodraeth Cymru, rydym wedi ymrwymo i adeiladu Powys decach lle mae gan bob plentyn y cyfle i lwyddo."