Cabinet yn cytuno ar uwchraddio rhwydwaith trafnidiaeth gyhoeddus Powys

25 June 2025

Mae cynlluniau i uwchraddio rhwydwaith trafnidiaeth gyhoeddus y sir wedi'u cytuno gan gabinet Cyngor Sir Powys.

Yn dilyn ymarfer ymgysylltu ac ymgynghori cynhwysfawr, mae'r cyngor wedi diwygio ei amserlenni bysiau lleol a'i lwybrau gwasanaeth, gan ymgorffori adborth y cyhoedd i sicrhau rhwydwaith trafnidiaeth fwy effeithlon, cynhwysol a chynaliadwy.

Nod y rhwydwaith wedi'i uwchraddio yw cyflawni uchelgais Powys Gynaliadwy o gysylltu cymunedau ac ardaloedd â'u trefi craidd o fewn awr o amser teithio. Mae hefyd yn darparu ar gyfer gwasanaethau pellter hirach ledled y sir ac ar gyfer teithio ymlaen i drefi a dinasoedd mwy ar draws y ffiniau y gallai fod angen i drigolion Powys eu cyrraedd ar gyfer iechyd, addysg a gwasanaethau eraill sydd ddim ar gael yn lleol.

Gyda chynnydd mewn llwybrau, niferoedd bysiau a mwy o opsiynau teithio gyda'r nos ac ar y penwythnos, bydd yr uwchraddio y cytunwyd arno yn gofyn am gyllid ychwanegol o fuddsoddiad unigol o £1.349m a chynnydd blynyddol yn y gyllideb o £2.354m. Bydd y costau hyn yn cael eu cyflwyno i gyfarfod Cyngor Llawn Eithriadol ar 4 Gorffennaf i'w cymeradwyo.

Dywedodd y Cynghorydd Jackie Charlton, Aelod Cabinet dros Bowys Wyrddach, "Yn dilyn y cytundeb yng nghyfarfod y cabinet heddiw i uwchraddio rhwydwaith trafnidiaeth gyhoeddus y sir, ac yn amodol ar gymeradwyaeth llawn y cyngor, bydd cymunedau Powys yn gallu elwa o sir fwy cysylltiedig cyn bo hir. Nod y rhwydwaith trafnidiaeth gyhoeddus sydd wedi'i uwchraddio ym Mhowys yw darparu gwasanaethau mwy dibynadwy a mwy aml mewn ardaloedd gwledig gyda chysylltiadau gwell rhwng trefi a gwasanaethau allweddol.

"Os caiff y gofynion ariannu ychwanegol eu cymeradwyo gan y cyngor llawn ddechrau'r mis nesaf, bydd y contractau saith mlynedd newydd yn cael eu dyfarnu i ystod o weithredwyr trafnidiaeth lleol a rhanbarthol a fydd yn dechrau darparu gwasanaethau gwell gyda mwy o gysylltedd o fis Medi 2025.

"Ynghyd â darpariaeth trafnidiaeth gyhoeddus well, rydym yn falch y bydd pobl ifanc Powys hefyd yn elwa o estyniad consesiwn teithio pobl ifanc Llywodraeth Cymru (FyNgherdynTeithio) o fis Medi 2025, gan ganiatáu iddynt deithio ar fysiau yng Nghymru am £1 yn unig."

Bydd manylion y gwasanaethau newydd yn cael eu cyhoeddi yn ddiweddarach yn yr haf.