Model Cyfleoedd Dydd Newydd
14 Awst 2025
Cynhaliwyd adolygiad o gyfleoedd dydd i oedolion hŷn ac oedolion ag anableddau dysgu. Cynhaliwyd ymgysylltiad cyhoeddus, gyda 34 o ddigwyddiadau cyhoeddus yn cael eu cynnal, gan ddenu 357 o gyfranogwyr, ac arolwg a dderbyniodd 472 o ymatebion. Datgelodd yr ymgysylltiad fod cynnig cymunedol bywiog ar draws y sir gyda chyfoeth o gyfleoedd dydd yn cael eu cynnig rhwng y sectorau statudol a'r trydydd sector.
Mae'r model newydd yn hyblyg, yn canolbwyntio ar gynyddu annibyniaeth, gwydnwch a chysylltiad cymunedol. Bydd yn darparu dull haenog o gefnogi, gan ganolbwyntio ar y canlynol:
Cymorth Ataliol: Mae'r haen hon yn darparu gwybodaeth, cyngor a chymorth I annog a chefnogi adeiladu sgiliau, annibyniaeth a chysylltiad cymdeithasol. Mae datblygu cydlynu ardal leol yn nodwedd allweddol, lle bydd cydlynwyr yn meithrin perthnasoedd yn rhagweithiol â phobl, eu rhwydweithiau cymorth a darparwyr gwasanaethau i ddatblygu cysylltiad a chydlyniant.
Cymorth Personol: Mae'r haen hon yn cynnig cymorth unigol i alluogi mynediad at wasanaethau a gweithgareddau cymunedol trwy ymyrraeth a chymorth wedi'I dargedu. Mae'r model yn mabwysiadu dull sy'n seiliedig ar gryfderau, gan ganolbwyntio ar gryfderau'r person a'u cefnogi i feithrin eu hyder a'u hannibyniaeth ar eu cyflymder eu hunain, yn ôl eu galluoedd eu hunain, o fewn cymunedau cynhwysol a chefnogol.
Cymorth Arbenigol: Mae'r haen hon yn darparu cyfleoedd dydd arbenigol o ansawdd uchel i bobl ag anghenion gofal a chymorth cymhleth a dwys. Mae'n cydnabod yr angen am gymorth sy'n seiliedig ar adeiladau lle mae'r amgylchedd, staff sydd wedi'u hyfforddi'n briodol, ac offer arbenigol yn hanfodol i ddiwallu anghenion unigolion.
Dywedodd yr Aelod Cabinet dros Bowys Gofalgar, y Cynghorydd Sian Cox: "Rydym yn creu model cyfleoedd dydd cynaliadwy a theg sy'n cefnogi pobl i fyw bywydau iach a gwerth chweil, fel aelodau gwerthfawr o'u cymunedau a'u cymdeithas, yn gallu cymryd rhan yn yr hyn sy'n bwysig iddynt; ac sy'n cefnogi gofalwyr di-dâl i wneud yr un peth.
"Rhywbeth sy'n allweddol i'n model newydd yw bod pobl yn gallu gwneud y mwyaf o'u lles personol mewn ffyrdd sy'n gweithio iddyn nhw fel unigolion, gan ddewis o ystod eang o gyfleoedd cymdeithasol, gwaith a hamdden, gan ddefnyddio ac adeiladu ar y cryfderau sydd ganddyn nhw eisoes, gyda ffocws ar annog iechyd a byw'n annibynnol; a chyda seibiant cyson, dibynadwy, dibryder i ofalwyr.
"Mae hwn yn fodel sy'n seiliedig ar leoliad, wedi'i gynllunio i weithio mewn partneriaeth agos â chymunedau, i feithrin dealltwriaeth wirioneddol o ddarpariaeth ac anghenion cymunedol, a sut y gallwn weithio gyda'n gilydd i lunio gwasanaethau lleol a sicrhau bod gan bob cymuned yr hyn sydd ei angen arni," ychwanegodd.
Rydym yn ail-gyflunio'r adeiladau a ddefnyddir ar gyfer cyfleoedd dydd, gyda ffocws ar wneud y defnydd mwyaf o gydleoli mewn asedau cymunedol. Ar hyn o bryd, rydym yn gweithio gyda phobl sy'n defnyddio'r gwasanaeth a'u teuluoedd i archwilio opsiynau eraill a fyddai'n diwallu eu hanghenion. Yr amserlen y cytunwyd arni yw cwblhau trefniadau newydd erbyn 31 Mawrth 2026. Ni fydd unrhyw newidiadau i'r ddarpariaeth bresennol yn digwydd nes bod y ddarpariaeth newydd ar waith, gyda ffocws ar drawsnewidiadau di-dor a chefnogol.
Ar hyn o bryd, byddai ein cynlluniau ar gyfer darparu cyfleoedd dydd yn y dyfodol mewn amrywiol leoliadau ym Mhowys yn cynnwys y canlynol:
- Y Trallwng: Coed Isaf ar gyfer oedolion ag anableddau dysgu.
- Y Drenewydd: Castell-Y-Dail ar gyfer oedolion ag anableddau dysgu a Hafan yr Afon ar gyfer pobl hŷn.
- Llandrindod: Y Llys ar gyfer pobl hŷn, a chynlluniau cymorth cymunedol.
- Aberhonddu: Byddai Arosfa yn dod yn ganolfan integredig ar gyfer pobl hŷn ac oedolion ag anableddau dysgu.
- Ystradgynlais: Lleoliad cymunedol ar gyfer pobl hŷn ac oedolion ag anableddau dysgu.
- Machynlleth: Byddai Cyfle Newydd yn dod yn ganolfan integredig ar gyfer pobl hŷn ac oedolion ag anableddau dysgu.
- Llanidloes: Byddai Maes y Wennol yn dod yn ganolfan integredig ar gyfer pobl hŷn ac oedolion ag anableddau dysgu.
- Gwasanaethau wedi'u comisiynu
Mae'r model newydd yn cynnwys y canlynol:
- Canolfannau dydd wedi'u hailgynllunio yn seiliedig ar ganlyniadau'r ymgysylltu, gan ganolbwyntio ar gyfleusterau cymunedol a chanolfannau integredig.
- Cydlynwyr Ardal Leol i ddarparu gwybodaeth, cyngor a chymorth, a helpu i feithrin gallu a chydnerthedd cymunedol.
- Cynghorwyr Cyflogaeth â Chymorth i wella cymorth cyflogaeth.
- Mae'r datblygu Cymorth Cartref i fwy o ardaloedd ledled y sir.
- Darparwyr byw â chymorth i ddarparu cyfleoedd yn ystod y dydd i'r bobl maen nhw'n eu cefnogi lle bo'n briodol gwneud hynny.
Bydd anghenion pawb sydd ag angen gofal a chymorth wedi'i asesu yn cael eu diwallu, a bydd y rhai sy'n symud i drefniant newydd yn cael eu cefnogi'n llawn drwy gydol y broses. Bydd y newid i leoliadau newydd neu ffyrdd newydd o wneud pethau yn gefnogol, yn canolbwyntio ar y person ac yn cael ei arwain gan anghenion.
Nod y newidiadau arfaethedig yw cynyddu llais, dewis a rheolaeth i ddefnyddwyr gwasanaeth wrth sicrhau cefnogaeth gynaliadwy o ansawdd uchel.
Rhannu'r dudalen hon
Argraffu
