Grantiau cyfalaf ar gael ar gyfer busnesau, gwerth hyd at £25k

21 Awst 2025

Gall busnesau ym Mhowys, a'r rhai sy'n symud i'r sir, wneud cais am gylch newydd o grantiau cyfalaf gwerth rhwng £5,000 a £25,000.

Mae'r rhain yn cael eu cynnig gan y cyngor sir ac yn cael eu hariannu gan Gronfa Ffyniant Gyffredin Llywodraeth y DU.

Gellir defnyddio Grantiau Cyfalaf Busnes Powys i:

• gefnogi prynu offer sy'n hybu cynhyrchiant neu ar gyfer creu cynhyrchion neu wasanaethau newydd, neu
• gefnogi buddsoddiad mewn technolegau gwyrddach, fel cael systemau goleuadau neu wresogi newydd sy'n fwy cynaliadwy na'r rhai sydd ganddynt ar hyn o bryd.

Rhaid cyflwyno datganiadau o ddiddordeb erbyn dydd Llun 15 Medi, gyda disgwyl i fusnesau llwyddiannus gyflwyno eu ceisiadau llawn cyn diwedd y dydd ar ddydd Gwener 3 Hydref.

"Rydym yn cynnig y grantiau hyn fel rhan o'n hymrwymiad parhaus i gefnogi datblygu economaidd a busnesau yn ystod y cyfnod heriol hwn," meddai'r Cynghorydd James Gibson-Watt, Aelod Cabinet Cyngor Sir Powys dros Bowys Fwy Llewyrchus. "Rydym am helpu mentrau lleol a mewnfuddsoddwyr ar bob cam o'u datblygiad, i ddechrau, cynnal, tyfu ac arloesi, gan gynnwys drwy rwydweithiau lleol.

"Mae'r grantiau cyfalaf hyn wedi'u hanelu'n benodol at hybu cynhyrchiant ac adeiladu cynaliadwyedd hirdymor."

Bydd pob grant yn seiliedig ar 50% o'r costau cymwys. Rhaid i arian cyfatebol fod yn arian parod, yn hytrach na chyflenwi gwasanaethau neu ddeunyddiau, ac o ffynonellau yn y sector preifat.

Gallwch gyflwyno datganiad o ddiddordeb ar gyfer Grant Cyfalaf Busnes Powys nawr: Sut i wneud cais

Pan fydd cais wedi'i gymeradwyo, rhaid i'r busnes dalu 100% o gost y prosiect cyn derbyn y grant y cytunwyd arno fel ad-daliad.

Mae'r broses ymgeisio yn un cystadleuol, a bydd gwerth am arian a'r effaith ddisgwyliedig yn ffactor allweddol pan fydd prosiectau'n cael eu gwerthuso a'u dewis.

Mae'r grant yn agored i ficro fusnesau, busnesau bach a chanolig (hyd at 250 o weithwyr), sydd wedi bod yn masnachu am chwe mis neu fwy o fewn y sectorau canlynol:

• Deunyddiau a Gweithgynhyrchu Uwch
• Adeiladu
• Diwydiannau Creadigol
• Ynni a'r Amgylchedd
• Cyllid a Gwasanaethau Proffesiynol
• Gwybodaeth, Technoleg a Thelegyfathrebiadau
• Gwyddorau Bywyd
• Bwyd a Diod
• Twristiaeth
• Mân-werthu
• Gofal

Bydd ceisiadau o sectorau eraill, heblaw am ffermio, pysgota, coedwigaeth a gwasanaethau statudol, yn cael eu hystyried, ar sail eu gwerth i'r economi leol.

Rhaid cyflwyno a thalu am bob prosiect sy'n gysylltiedig â'r grant erbyn 18 Ionawr 2026.

Mae Cyngor Sir Powys hefyd am glywed gan gwmnïau, yn y sir a thu allan iddi, sydd angen safleoedd neu eiddo newydd i'w helpu i ehangu.

Gallant ddefnyddio'r ffurflen ar-lein hon i ddarparu eu manylion cyswllt, fel y gall swyddogion cymorth busnes gysylltu â chi: https://powysapi.evolutive.co.uk/form/anonymousform/67d2d993b18d8d42d1a24c95?&redirecturl=

Ychwanegodd y Cynghorydd Gibson-Watt: "Rydym am helpu busnesau Powys i gyrraedd eu potensial llawn, felly rhowch wybod i ni os gallwn wneud unrhyw beth i'ch helpu i ddod o hyd i'r safle neu'r eiddo newydd sydd ei angen arnoch nawr neu ymhen ychydig flynyddoedd."

Dylai unrhyw un sydd â chwestiynau am ddatblygu economaidd ym Mhowys anfon e-bost at: economicdevelopment@powys.gov.uk

LLUN: Derbyniodd CastAlum, yn Y Trallwng, Grant Twf Busnes drwy Gyngor Sir Powys y llynedd gwerth £25,000, ac fe'i defnyddiwyd tuag at y gost o ddiweddaru dau o'i beiriannau dei-gastio. Dyma nhw gydag un o'r peiriannau y maen nhw wedi ei ddiweddaru (o'r chwith): Karl Meredith, Rheolwr Gyfarwyddwr; Simon Grimwade, Rheolwr y Ffatri; a Neil Simmonds, Rheolwr Cynnal a Chadw.