Diweddariad Cyfleuster Swmpio Gogledd Powys

3 Tachwedd 2025

Yn ddiweddar, fe wnaeth aelodau o'r gymuned leol fynychu noson agored yng Nghyfleuster Swmpio Gogledd Powys yn Aber-miwl i ddysgu'n uniongyrchol am gynlluniau'r safle ar gyfer y dyfodol a gwasanaeth gwastraff ac ailgylchu'r cyngor.

Cafodd ymwelwyr â noson agoriadol y gymuned ym mis Medi gyfle i edrych o gwmpas a siarad â staff am sut mae'r cyfleuster yn gweithredu ar hyn o bryd yn ogystal â chynlluniau'r cyngor i ddod â gwastraff gweddilliol (gwastraff a gesglir mewn biniau olwynion a bagiau porffor) o ogledd y sir i'r safle i'w swmpio, cyn iddo gael ei drosglwyddo i gyfleuster trin gwastraff.

Mae cais cynllunio i dderbyn gwastraff gweddilliol (gwastraff a gesglir mewn biniau olwynion a bagiau porffor) yng Nghyfleuster Swmpio Gogledd Powys yn Aber-miwl, bellach wedi'i gyflwyno.

Dyluniwyd y safle ar gyrion y pentref yn benodol i ganiatáu i wasanaethau gwastraff ac ailgylchu'r cyngor gael eu rhedeg yn effeithlon ac yn ddiogel. Ynghyd â'r caniatâd cynllunio presennol, mae'r safle hefyd yn gweithredu o dan Drwydded Amgylcheddol a gyhoeddwyd gan Cyfoeth Naturiol Cymru (CNC). Mae hyn yn caniatáu i'r gwastraff a ganiateir, gan gynnwys gwastraff gweddilliol ac ailgylchadwy (megis gwastraff bwyd, papur, cardbord, plastig, caniau, gwydr a gwastraff gardd), gael ei storio ar y safle cyn ei drosglwyddo i'w brosesu. Mae'r drwydded yn cynnwys gofynion llym ynghylch sut mae'r safle'n cael ei weithredu i sicrhau bod unrhyw effaith bosibl ar yr amgylchedd a'r gymuned leol yn cael ei rheoli a'i lleihau.

Mae'r cyfleuster swmpio wedi bod yn gwbl weithredol ers mis Medi 2023 ac mae eisoes wedi profi i fod yn ased mawr i'r cyngor, fel cyfleuster i dderbyn a swmpio'r ailgylchu ar ymyl y ffordd o ogledd y sir. Mewn ymgais i ostwng costau, lleihau ein hôl troed carbon a sicrhau bod gwasanaeth gwastraff ac ailgylchu'r cyngor yn parhau i fod yn gynaliadwy ar gyfer y dyfodol, rydym bellach yn bwriadu defnyddio capasiti'r safle yn llawn, yn unol â'r gofynion seilwaith a amlinellir yn y Strategaeth Adnoddau Cynaliadwy a gymeradwywyd yn ddiweddar.

"Roeddwn i'n falch iawn o glywed bod dros 40 o drigolion lleol wedi mynychu ein noson agored. Roedd yn gyfle gwych i'r rhai oedd â diddordeb gael sgwrs wyneb yn wyneb am y cynlluniau, a chyfle i weld drostyn nhw eu hunain pa mor dda mae'r cyfleuster swmpio yn cael ei weithredu a sut mae unrhyw effeithiau posibl yn cael eu rheoli." eglura'r Cynghorydd Jackie Charlton, Aelod Cabinet dros Bowys Werddach.

"Mae'r safle eisoes yn gweithio'n dda ac mae ganddo ddigon o gapasiti i dderbyn gwastraff gweddilliol heb orfod gwneud unrhyw newidiadau i'r ffordd y caiff ei weithredu, sy'n golygu na ddylai'r gymuned leol sylwi ar unrhyw newidiadau o gwbl. Bydd y safle'n parhau i gael ei redeg i'r safonau uchaf a bydd wrth gwrs yn cael ei fonitro yn unol â gofynion llym trwydded amgylcheddol Cyfoeth Naturiol Cymru.

"Ar hyn o bryd, mae gwastraff gweddilliol o ogledd y sir yn cael ei gludo i orsaf drosglwyddo trydydd parti am gost ychwanegol sylweddol i'r cyngor yn ogystal â chanlyniad i fwy o amser teithio ac allyriadau carbon o'r fflyd o gerbydau casglu. Drwy ddefnyddio'r safle i'w botensial llawn, gallwn redeg ein gwasanaeth gwastraff ac ailgylchu yn fwy cynaliadwy, gan leihau costau a lleihau ein hôl troed carbon."