Powys yn cwblhau'r model ar gyfer cyfleoedd dydd yn Llanidloes

28 Tachwedd 2025

Mae Cyngor Sir Powys wedi cadarnhau y bydd gwasanaeth gydol oes newydd i oedolion sef Cyfleoedd Dydd Llanidloes, yn cael ei ddarparu o Faes y Wennol a Sylfaen, safleoedd cyfagos yn y dref.

Yn dilyn penderfyniad gan y Cabinet ym mis Mai 2025, bydd model Cyfleoedd Dydd newydd yn cael ei weithredu ledled Powys gan ddefnyddio dull sy'n seiliedig ar ardal leol.

Mae'r model newydd yn hyblyg, yn canolbwyntio ar gynyddu annibyniaeth, cadernid a chysylltiad cymunedol. Bydd yn darparu dull haenog o gymorth yn seiliedig ar anghenion unigol, gan ganolbwyntio ar Gymorth Ataliol, Arbenigol ac wedi'i Bersonoli. Bydd hyn yn arwain at fwy o gyfleoedd wedi'u teilwra ar gyfer anghenion penodol preswylwyr.

Yn dilyn mwy o sgyrsiau â'r gymuned yn Llanidloes, bydd y gwasanaethau a gynhelir ar hyn o bryd yn Sylfaen a Maes y Wennol yn uno ac yn creu un gwasanaeth. Bydd y cyfleoedd synhwyraidd ac allanol a ddarperir yn Sylfaen yn cael eu cadw fel ystafell synhwyraidd o fewn y gwasanaeth Cyfleoedd Dydd Llanidloes ehangach.

Drwy gadw rhan o'r adeilad yn Sylfaen (y gerddi, twnel polythen, cegin, ystafell ymolchi, ardaloedd synhwyraidd) byddwn yn gallu darparu model cymorth i bob oed, wedi'i gynllunio i ddarparu gwasanaethau cynhwysol sy'n canolbwyntio ar yr unigolyn sy'n pontio ar draws pob grŵp oedran a lefelau angen. Ni fydd newid i'r ganolfan ddydd ym Maes y Wennol, na'r dyddiau a'r amseroedd y mae ar agor.

Mae pobl sy'n byw'n annibynnol erbyn hyn yn cael eu hanghenion eu bodloni gan eu darparwr byw cymorth yn y gymuned. Dechreuodd y newid hwn ym mis Hydref ac mae adolygiadau cynnar yn gadarnhaol.

Gyda'r newidiadau hyn ar waith, mae llai o alw am le yn Sylfaen. Mae grŵp cymunedol lleol wedi mynegi diddordeb mewn rhentu gweddill yr adeilad ac mae hyn yn cael ei ystyried.

"Mae symud i fodel cymdeithasol o ofal yn rhan hanfodol o'r newidiadau rwy'n gobeithio eu datblygu ar gyfer gofal cymdeithasol i oedolion. Mae'r newidiadau yn Llanidloes yn enghraifft o hyn, gan gyfuno cyfleoedd newydd ar gyfer y rhai a fydd yn elwa ohonynt drwy ddiogelu'r ddarpariaeth ar gyfer y rhai sydd â'r angen mwyaf." Dywedodd y Cynghorydd Pete Roberts, Aelod Cabinet ar gyfer Powys Ofalgar.

"Y mis diwethaf clywais yn uniongyrchol gan y gymuned ac mae mynd i'r afael â'u pryderon am golli'r ddarpariaeth synhwyraidd wedi bod wrth wraidd y penderfyniad hwn i gadw rhan o'r adeilad yn hytrach na throsglwyddo'r cyfarpar i ystafelloedd ym Maes y Wennol."