Trigolion Powys yn cefnogi system archebu canolfannau ailgylchu yn dilyn adolygiad sylweddol
Translation Required:
4 Mawrth 2025
Cynhaliwyd yr adolygiad mawr chwe mis ar ôl i'r system archebu a'r ffioedd DIY gael eu cyflwyno ym mis Ebrill 2025, a chasglodd farn gan fwy na 6,000 o drigolion, ochr yn ochr ag adborth staff, gweithdai cynghorwyr, ac ystyriodd bethau fel tipio anghyfreithlon, cyfradd ailgylchu a chanmoliaeth a chwynion cwsmeriaid.
Ar y cyfan, mae'r adolygiad wedi dangos cefnogaeth gref i'r system archebu gyda 93% o'r rhai a holwyd yn dweud bod y system archebu yn hawdd i'w defnyddio, a bron i dri chwarter (74%) eisiau iddi aros. Canmolodd llawer yr ymweliadau esmwyth, dim ciwiau, a mwy o gefnogaeth gan staff ar y safle, gan ddweud bod eu hymweliadau bellach yn gyflymach, yn dawelach ac yn fwy effeithlon.
Er bod rhai wedi codi pryderon am lai o hyblygrwydd, canfu'r adolygiad fod natur ragweladwy ac effeithlonrwydd y system wedi gwella'r ffordd y mae'r safleoedd yn gweithredu yn sylweddol.
Edrychodd yr adolygiad hefyd ar y ffioedd am rai mathau o wastraff DIY. Tra fod hyn yn llai poblogaidd, roedd llawer o drigolion yn deall pam fod angen y ffioedd, ac yn bwysig, mae achosion o dipio anghyfreithlon neu danau gwyllt wedi aros o fewn y lefelau disgwyliedig ers iddynt gael eu cyflwyno. Mae canfyddiadau cadarnhaol eraill yn cynnwys:
• 96% o breswylwyr yn canmol staff am fod yn gymwynasgar
• 85% yn dweud fod y safleoedd yn lanach, yn fwy diogel ac wedi eu trefnu'n well
• Dywed staff fod y system wedi gwneud eu swyddi yn haws ac wedi gwella diogelwch
Yn seiliedig ar y canfyddiadau, mae'r adroddiad yn argymell bod y system archebu a'r ffioedd DIY yn parhau. Mae'r gwelliannau a amlygwyd drwy'r adolygiad eisoes wedi'u gweithredu, gan gynnwys:
• Oriau agor estynedig mewn rhai safleoedd
• Cynyddu nifer y slotiau archebu sydd ar gael lle mae'r galw yn uchel
• Opsiwn newydd i ofyn am gymorth tra ar y safle drwy'r ffurflen archebu
• Addasiadau i'r broses archebu arlein i'w gwneud hi'n haws i ddefnyddwyr
• Cynlluniau ar waith i ehangu cyfleoedd ailddefnyddio mewn mwy o ganolfannau
Meddai'r Cynghorydd Jackie Charlton, Aelod Cabinet dros Bowys Wyrddach: "Mae'r adolygiad yn ei gwneud hi'n glir bod y system newydd yn gweithio'n dda i breswylwyr a staff, tra hefyd yn darparu manteision gwirioneddol o ran diogelwch, effeithlonrwydd, ansawdd ailgylchu, a phrofiad cwsmeriaid.
"Deallwn fod yna wastad rywfaint o ansicrwydd pan gaiff newidiadau eu cyflwyno ac mae'n galonogol gweld bod trigolion wedi gweld drostynt eu hunain y manteision o gyflwyno'r system archebu ac yn awr yn gefnogol i'w chadw.
"Fel y byddech chi'n disgwyl, byddwn yn parhau i weithio gyda'n contractwyr i fonitro a gwneud gwelliannau i'r canolfannau ailgylchu yn rheolaidd yn unol â'n Strategaeth Adnoddau Cynaliadwy (Gwastraff ac Ailgylchu), gan gynnwys ymestyn yr opsiwn i ailddefnyddio ac atgyweirio."
