Diwrnod cyngor ar gostau byw yn Llyfrgell Ystradgynlais
6 Hydref 2022
Bydd Llyfrgell Ystradgynlais yn cynnal y diwrnod cyngor ddydd Iau 13 Hydref lle bydd trigolion sy'n wynebu caledi costau byw yn gallu derbyn cyngor a chymorth.
Bydd y diwrnod yn dechrau am 11am ac yn gorffen am 4pm. Trefnwyd y digwyddiad gan Wasanaethau Diwylliannol Cyngor Sir Powys a Chymdeithas Mudiadau Gwirfoddol Powys, a bydd yn gyfle i bobl gysylltu â chynrychiolwyr nifer fawr o sefydliadau sy'n gallu cynnig cymorth ymarferol dros y cyfnod anodd hwn.
Bydd staff y cyngor ac asiantaethau eraill wrth law i helpu unrhyw un sy'n poeni am brisiau'n codi, a bydd cyngor ar gyllidebu, arbed ynni, derbyn budd-daliadau a mwy.
Y sefydliadau fydd yno yw:
- Fferyllfeydd cymunedol
- Yr Adran Gwaith a Phensiynau
- Heddlu Dyfed Powys
- NEST (Ymddiriedolaeth Arbed Ynni)
- Pobl
- Cyngor ar Bopeth Powys
- Adran Tai Cyngor Sir Powys
- Tîm Cyngor Ariannol - Cyngor Sir Powys
- Cymru Gynnes
- Banc bwyd Ystradgynlais
- Breuddwydion Cymunedol Ystradgynlais
Meddai'r Cynghorydd David Selby, Aelod Cabinet ar gyfer Powys Fwy Llewyrchus: "Rwy'n falch fod y llyfrgell yn gallu cynnal y digwyddiad pwysig hwn. Hoffwn ddiolch i'r holl sefydliadau sy'n rhan o'r diwrnod cyngor hwn. Mae'n ddefnyddiol dros ben cael pawb o dan yr un to i gynnig cyngor ac arweiniad dros yr argyfwng costau byw ac i gefnogi pobl Powys."
Dywedodd y Cynghorydd Matthew Dorrance, Dirprwy Arweinydd Cyngor Sir Powys ac Aelod Cabinet ar gyfer Powys Decach: "Rwy'n annog pawb yng nghymuned Ystradgynlais sy'n cael pethau'n anodd ar hyn o bryd, i alw heibio'r llyfrgell a chael y cyngor ac arweiniad angenrheidiol."
Os hoffech gysylltu â Llyfrgell Ystradgynlais, mae'r manylion cyswllt i'w gweld yma: https://cy.powys.gov.uk/llyfrgellystradgynlais
I fod yn bartner ac yn rhan o'r digwyddiad, cysylltwch â Nichola Farr: nichola.farr@powys.gov.uk