Casgliadau ailgylchu gwastraff gardd
10 Chwefror 2025
Mae'r holl danysgrifwyr blaenorol wedi cael gwybod ac wedi cael cyfle i gofrestru ar gyfer tymor arall. Fodd bynnag, os oes angen i chi adnewyddu eich tanysgrifiad o hyd, neu gofrestru am y tro cyntaf, gallwch wneud hynny unrhyw bryd drwy fynd i Casglu gwastraff o'r ardd neu ffonio 01597 827465.
Mae'r gwasanaeth casglu ailgylchu gwastraff gardd yn darparu ffordd hawdd, lân a syml o gael gwared ar eich gwastraff gardd, gan wybod y bydd y cyfan yn cael ei gasglu, ei ailgylchu a'i droi'n gompost.
Bydd y tanysgrifiad ar gyfer tymor 2025 yn costio £60. Mae hyn yn cynnwys llogi bin olwynion 240-litr a chasglu eich gwastraff gardd bob pythefnos rhwng 3 Mawrth a 28 Tachwedd. Mae bin llai ar gael am bris gostyngol i gartrefi sydd â gerddi bach, neu sachau gwastraff gardd y gellir eu compostio ar gyfer y rhai y mae eu sbwriel gweddilliol wedi'i gasglu mewn bagiau porffor.
"Rydyn ni i gyd yn edrych ymlaen yn fawr at ddyfodiad y gwanwyn, i gael tywydd brafiach yn ôl ac i fynd allan i'n gerddi." Meddai'r Cynghorydd Jackie Charlton, Aelod Cabinet dros Bowys Wyrddach.
"Rydym yn gwerthfawrogi nad yw codi prisiau yn cael ei groesawu. Fodd bynnag, mae tanysgrifiad 2025 wedi gweld cynnydd pris tebyg i'r llynedd oherwydd y penderfyniadau ariannol anodd y mae'r cyngor yn parhau i'w hwynebu wrth fantoli'r gyllideb. Bydd y drwg angenrheidiol hwn yn ein galluogi i dalu costau a pharhau i gynnig y casgliad hwn o ymyl y ffordd i'n trigolion ledled y sir tra hefyd yn diogelu darpariaeth gwasanaeth craidd y cyngor.
"Mae'r tâl blynyddol o £60 yn unol â nifer o awdurdodau eraill sy'n darparu'r gwasanaeth hwn ac mae'n cwmpasu 20 o gasgliadau drwy gydol y flwyddyn. Pan fydd yr anghyfleustra o gludo gwastraff gwyrdd i ganolfan ailgylchu cartrefi ynghyd â chostau tanwydd yn cael ei ystyried, mae'r gwasanaeth yn dal i fod yn opsiwn da i drigolion.
"Mae pris 2025 yn seiliedig ar y cynnydd sy'n cael ei gymeradwyo gan y Cyngor Llawn yn yr wythnosau nesaf, ond gyda'r tymor garddio ar y gweill yn fuan, nid oeddem am oedi cyn dechrau casgliadau tra byddwn yn aros am benderfyniad terfynol. Os na chaiff ei gymeradwyo, bydd tanysgrifwyr sydd eisoes wedi ymuno â'r gwasanaeth yn cael ad-daliad o'r gwahaniaeth."
Os ydych yn ail-danysgrifio am flwyddyn arall, byddwch yn derbyn sticer i'w roi ar eich bin olwynion gwyrdd i helpu i ddangos i'r criw eich bod wedi cofrestru ar gyfer casgliadau 2025. Bydd tanysgrifwyr newydd i'r gwasanaeth yn cael eu bin olwynion gwyrdd wedi'i ddosbarthu o fewn 10 diwrnod gwaith, felly gwnewch yn siŵr eich bod yn cofrestru'n gynnar i elwa ar gynifer o'r casgliadau sydd wedi'u hamserlennu â phosibl.
Gallwch danysgrifio nawr drwy fynd i Casglu gwastraff o'r ardd neu drwy ffonio 01597 827465.
Ar ôl tanysgrifio ar gyfer tymor 2025, cofiwch wirio eich diwrnod casglu - efallai ei fod wedi newid ers y llynedd: Diwrnod casglu biniau
Bydd trigolion nad ydynt yn tanysgrifio i'r gwasanaeth yn dal i allu compostio eu gwastraff gardd gartref neu fynd ag ef i un o'r pum canolfan ailgylchu cartrefi ym Mhowys.
Rhannu'r dudalen hon
Argraffu
