Y Cyngor yn ystyried cau campws ysgol gynradd wrth i niferoedd y disgyblion ostwng
8 Hydref 2025
Agorwyd Ysgol Golwg Pen y Fan ym mis Medi 2024 drwy ddod â thair ysgol ynghyd o dan un corff llywodraethu. Ar hyn o bryd, mae'r ysgol ar wasgar dros dri safle yn Aberhonddu a Chradoc, cyn iddi symud i ysgol newydd sbon a adeiladwyd yn bwrpasol ar hen safle Ysgol Uwchradd Aberhonddu, a gynlluniwyd i ddod â phawb ynghyd o dan yr un to.
Mae cynlluniau ar gyfer yr adeilad newydd yn mynd rhagddynt ar garlam. Gyda chefnogaeth Llywodraeth Cymru a'r Cyngor Sir Powys, mae'r weledigaeth yn dod yn realiti. Disgwylir i gontractwr gael ei benodi yn gynnar yn 2026, ac er na fydd yr adeilad yn barod erbyn diwedd 2026 fel y gobeithiwyd gyntaf, mae'r daith wedi hen ddechrau. Bydd y gofod newydd hwn yn fwy na brics a morter yn unig - bydd yn gartref bywiog, modern ar gyfer dysgu, twf, a chyfle i ddisgyblion a staff.
Fodd bynnag, mae nifer y disgyblion wedi gostwng yn sylweddol ar gampws Cradoc ac mae'r cyngor yn ystyried a ddylai'r campws gau cyn symud i'r adeilad newydd. Gwelodd y campws ostyngiad o 71 o ddisgyblion ym mis Medi 2024 i ddim ond 39 ym mis Medi 2025. Rhagwelir y bydd gostyngiad pellach, gyda niferoedd disgyblion yn gostwng i 32 erbyn Medi 2026
Mae'r cynnig, sy'n cyd-fynd â Strategaeth y cyngor ar gyfer Trawsnewid Addysg ym Mhowys, yn cael ei ysgogi gan amrywiaeth o fanteision addysgol a gweithredol.
Bydd cyfuno safleoedd yn symleiddio arweinyddiaeth a rheolaeth, yn lleihau teithio a dyblygu ymdrech, ac yn cynhyrchu arbedion costau ar gynnal a chadw a gweinyddu. Bydd hefyd yn helpu i gydbwyso niferoedd disgyblion ar draws lleoliadau, lleihau lleoedd gwag, a galluogi cynnig addysgol mwy cyson i bob dysgwr.
Dywedodd y Cynghorydd James Gibson-Watt, Aelod Cabinet ar gyfer Powys sy'n Dysgu: "Rydym wedi ymrwymo i sicrhau'r dechrau gorau posibl i'n dysgwyr a chredwn y bydd ein Strategaeth ar gyfer Trawsnewid Addysg ym Mhowys yn cyflawni hyn.
"Fel rhan o'r strategaeth, mae angen i ni fynd i'r afael â'r gyfran uchel o ysgolion bach yn y sir, niferoedd disgyblion sy'n lleihau a'r nifer uchel o leoedd dros ben.
"Ar hyn o bryd, mae gan gampws Cradoc gapasiti dros ben o 75% ac mae'n wynebu heriau wrth gynnig yr un lefel o ddarpariaeth â'r safleoedd eraill, gan gynnwys mynediad at ofal cofleidiol.
"Bydd dod â staff a disgyblion ynghyd yn cefnogi cydweithio cryfach, gan ganiatáu grwpio mwy effeithiol yn ôl gallu neu angen, a meithrin datblygu cymdeithasol drwy grwpiau cyfoedion mwy. Mae hefyd yn ei gwneud hi'n fwy hyfyw i redeg clybiau, timau chwaraeon a gweithgareddau cyfoethogi.
"Rydym yn parhau i fod yn ymroddedig i ddarparu adeilad ysgol newydd ar gyfer Ysgol Golwg Pen y Fan ac mae'r cynlluniau hyn yn symud ymlaen. Mae'r cynnig hwn yn rhoi mwy o sicrwydd i'r ysgol cyn iddynt symud."
I ddarllen y Strategaeth ddiweddaraf ar gyfer Trawsnewid Addysg 2020-2032 a manylion y Rhaglen Trawsnewid Addysg - Ton 2 (2022 - 2027) ewch i Trawsnewid Addysg
Rhannu'r dudalen hon
Argraffu
