Cyflwyno cais cynllunio ar gyfer adeilad newydd ysgol Pontsenni

21 Tachwedd 2025

Mae'r cyngor sir wedi cyhoeddi bod cynlluniau cyffrous ar gyfer adeilad ysgol newydd i ddysgwyr yn ne Powys wedi cymryd cam arwyddocaol arall ymlaen gyda chyflwyno cais cynllunio.

Mae Cyngor Sir Powys wedi cyflwyno ei gais cynllunio i adeiladu ysgol gynradd newydd gyda 120 o leoedd i gymryd lle adeilad presennol Ysgol Gynradd Pontsenni, nad yw bellach yn addas i ddiwallu anghenion cwricwlwm ar gyfer yr Unfed Ganrif ar Hugain na gofynion llesiant disgyblion.

Bydd Awdurdod Parc Cenedlaethol Bannau Brycheiniog yn ystyried y cais cynllunio.

Bydd yr adeilad newydd yn darparu cyfleusterau modern, addas i'r diben a fydd yn galluogi'r cwricwlwm i gael ei gyflwyno mewn ffordd barhaus a chydlynol o'r Cyfnod Sylfaen hyd at ddiwedd Cyfnod Allweddol 2. Bydd darpariaeth gofal plant blynyddoedd cynnar hefyd yn cael ei chyd-leoli ar yr un safle fel rhan o'r cynlluniau hyn.

Mae'r prosiect hwn yn rhan allweddol o Strategaeth y cyngor ar gyfer Trawsnewid Addysg ym Mhowys, sydd â'r nod o wella profiadau a chanlyniadau dysgwyr drwy fuddsoddi mewn amgylcheddau dysgu o ansawdd uchel.

Bydd hefyd yn cyfrannu at weledigaeth y cyngor ar gyfer Powys Gryfach, Tecach, Wyrddach drwy greu adeilad sy'n defnyddio ynni'n effeithlon ac sy'n cefnogi nodau cynaliadwyedd ac sy'n gwella cyflawniad addysgol a lles dysgwyr.

Dywedodd y Cynghorydd James Gibson-Watt, Aelod Cabinet ar gyfer Powys sy'n Dysgu: "Mae cyflwyno'r cais cynllunio yn garreg filltir bwysig ar gyfer darparu ysgol newydd ar gyfer Pontsenni.

"Bydd y buddsoddiad hwn yn sicrhau bod gan ddisgyblion fynediad at gyfleusterau sy'n bodloni safonau modern ac yn cefnogi eu dysgu a'u lles. Mae hefyd yn adlewyrchu ein hymrwymiad i drawsnewid addysg ac adeiladu dyfodol cryfach, tecach a gwyrddach i Bowys."

I gael rhagor o wybodaeth am Drawsnewid Addysg ym Mhowys, ewch i Trawsnewid Addysg