Gwobr fawr i ofalwyr a helpodd ddyn ifanc i 'ddod o hyd i'w lais'

22 Rhagfyr 2025

Mae cwpl o Bowys, sy'n gweithio fel gofalwyr Cysylltu Bywydau, wedi cipio gwobr fawr am helpu dyn ifanc, a oedd gynt ond yn siarad â'i fam, i 'ddod o hyd i'w lais'.

Enillodd John a Stacey Darrell, o Landrindod, wobr Byw'n Dda yng Ngwobrau Cysylltu Bywydau a Mwy 2025 ym mis Tachwedd.

Ystyriwyd eu gwaith fel enghraifft ysbrydoledig o gefnogaeth a gofal sy'n canolbwyntio ar y person gan ofalwyr Cysylltu Bywydau ledled y DU.

Dywedwyd yn y seremoni ar-lein fod John a Stacey wedi defnyddio amynedd, cysondeb ac anogaeth dyner i helpu'r dyn ifanc maen nhw'n ei gefnogi i ddatblygu ei hyder, gwneud ffrindiau ac ymgysylltu'n llawn ym mywyd y gymuned.

Dywedodd John Darrell wrth dderbyn y wobr: "Rydym wedi bod yn ofalwyr Cysylltu Bywydau ers tua 12 mlynedd. Rydym yn meddwl mai dyma'r peth gorau... Rydych chi'n dod i adnabod rhywun yn dda iawn, iawn. Maen nhw'n dod yn rhan o'r uned deuluol yn llythrennol."

Mae John a Stacey yn gweithio fel gofalwyr Cysylltu Bywydau - teuluoedd neu unigolion sy'n rhannu eu cartref gydag oedolion sydd angen ychydig o gefnogaeth ychwanegol i'w helpu i ffynnu - i Gyngor Sir Powys.

Dywedodd y Cynghorydd Pete Roberts, Aelod Cabinet y cyngor dros Bowys Gofalgar: "Mae cefnogaeth John a Stacey wedi bod yn drawsnewidiol ac wedi helpu'r dyn ifanc hwn i ddod o hyd i'w lais yn llythrennol.

"Mae staff Cynllun Cysylltu Bywydau Powys yn dweud wrtha i eu bod nhw wedi cyflawni'r hyn a wnaethon nhw drwy beidio â rhuthro'r dyn ifanc hwn, ond drwy ei dderbyn a dangos llawer o amynedd yn lle hynny. Da iawn John a Stacey!"

Ychwanegodd Ewan King, Prif Weithredwr, Cysylltu Bywydau a Mwy: "Mae Cysylltu Bywydau yn dangos sut olwg sydd ar ofal cymdeithasol da - pobl yn rhannu cartrefi, bywydau, a chysylltiadau cymunedol sy'n helpu pawb i berthyn a byw bywyd yn eu ffordd eu hunain. Mae gofalwyr Cysylltu Bywydau yn agor eu cartrefi i oedolion a phobl ifanc sydd angen cefnogaeth, gan adeiladu perthnasoedd ymddiriedus a chytbwys sy'n hyrwyddo annibyniaeth a chysylltiad cymdeithasol."

I gael rhagor o wybodaeth am ddod yn ofalwr Cysylltu Bywydau ym Mhowys, e-bostiwch shared.lives@powys.gov.uk neu ffoniwch 01597 826539.

Mae rhagor o wybodaeth hefyd ar gael ar wefan Cyngor Sir Powys: Cysylltu Bywydau

Mae gofalwyr Cysylltu Bywydau yn darparu cefnogaeth hirdymor, seibiannau byr, brys a chymorth dydd i oedolion ag anableddau dysgu a chorfforol, colli synhwyrau, anhwylderau'r sbectrwm awtistig, dementia, y rhai sy'n profi iechyd meddwl gwael, neu broblemau gyda chamddefnyddio sylweddau. Maent hefyd yn helpu pobl hŷn.

Maent yn derbyn lwfans, pan fydd y person y maent yn gofalu amdano yn aros gyda nhw. Mae ganddynt hefyd fynediad at gyfleoedd hyfforddi, hawl i seibiant a chefnogaeth gan y tîm Cysylltu Bywydau.

Mwy o wybodaeth am Gysylltu Bywydau a Mwy: https://sharedlivesplus.org.uk/

LLUN: John a Stacey Darrell gyda'u gwobr Byw'n Dda. Llun: Cysylltu Bywydau a Mwy