Help i weddw ffermwr hawlio bron i £20,000 y flwyddyn mewn budd-daliadau
25 Mawrth 2025
Ar ôl colli ei gŵr ym mis Ionawr 2023, roedd Yvonne Bowkett, o Gastell-paen, yn cael trafferth gyda galar a'i phroblemau iechyd ei hun, pan drodd at y cyngor a'r Swyddog Cyngor a Chymorth Ariannol Ruth Mills am help.
Llwyddodd Ruth i'w harwain drwy'r broses o wneud cais am fudd-daliadau iechyd a phrawf modd, gan sicrhau incwm o bron i £20,000 y flwyddyn, ynghyd ag ôl-daliadau.
Fe wnaeth hi hefyd sicrhau gostyngiad i'w threth gyngor a'i helpu i wneud cais am Fathodyn Glas, sy'n rhoi consesiynau parcio i bobl ag anableddau.
Ychwanegodd Yvonne: "Ar ôl damwain ac arhosiad hir yn yr ysbyty, roedd Ruth yno i'm cynorthwyo eto gyda rhagor o gymorth ariannol, gan gynnwys sicrhau car Motability. Mae ei chyngor a'i chefnogaeth wedi bod yn amhrisiadwy, ac nid wyf yn gwybod beth fyddwn i wedi'i wneud hebddi.
"Mae Ruth bob amser yn broffesiynol, ond eto'n ofalgar, a bob amser ar ochr arall y ffôn gyda chefnogaeth a chyngor ac rwyf mor ddiolchgar am ei help ac am y gwasanaeth a ddarperir gan Gyngor Sir Powys."
Cyn hynny, roedd Ruth wedi helpu Yvonne (Tachwedd 2022), tra bod ei gŵr yn sâl â chanser, fel rhan o gynllun a gefnogwyd gan Gymorth Canser Macmillan.
Ar yr achlysur hwnnw roedd hi wedi helpu i wneud cais am Lwfans Gweini - budd-dal sy'n talu costau ychwanegol a ddaw yn sgil cyflwr iechyd neu anabledd - i ŵr Yvonne. Gwnaeth Ruth hefyd sicrhau eu bod yn derbyn yr holl fudd-daliadau yr oedd ganddynt hawl iddynt, gan fod Yvonne newydd roi'r gorau i weithio i ofalu am ei gŵr yn llawn amser.
Dywedodd y Cynghorydd Matthew Dorrance, Dirprwy Arweinydd ac Aelod Cabinet Cyngor Sir Powys ar gyfer Powys Decach: "Mae'r gefnogaeth a ddarparwyd gan ein gwasanaeth cynghori ariannol i Yvonne Bowkett wedi bod o'r radd flaenaf, ond gwyddom fod llawer o drigolion eraill ledled Powys fel Yvonne, nad ydynt wedi dod atom eto am help.
"Peidiwch â straffaglu ar eich pen eich hun os ydych mewn trafferthion ariannol, neu os yw'ch amgylchiadau wedi newid yn sydyn, fel y gwnaethant ar gyfer Yvonne: cysylltwch â ni am arweiniad cyfrinachol ac am ddim ar fudd-daliadau, biliau a dyled."
Gellir cael gwasanaeth cyngor ariannol Cyngor Sir Powys ar-lein: Cais am Gyngor Ariannol neu Gymorth Macmillan
Gellir rhoi cymorth dros y ffôn hefyd, os oes angen, drwy ffonio: 01597 826618.
Mwy o wybodaeth am ostyngiadau'r Dreth Gyngor: Gostyngiad yn Nhreth y Cyngor
Mwy o wybodaeth am fathodynnau glas: Gwneud cais am Fathodyn Glas
Mwy o wybodaeth am Lwfans Gweini: https://www.gov.uk/attendance-allowance/how-to-claim
Gallai trigolion Powys sy'n ei chael hi'n anodd talu eu rhent neu symud i gartref rhent newydd hefyd fod yn gymwys i gael Taliad Tai Dewisol: Taliadau Tai yn ôl Disgresiwn
LLUN: Yvonne Bowkett (chwith) o Gastell-paen gyda'r Swyddog Cyngor a Chymorth Ariannol Ruth Mills.
Rhannu'r dudalen hon
Argraffu
